ზელენსკი: უკრაინამ პარტნიორებს შესთავაზა, რუსეთთან ინფრასტრუქტურულ დარტყმებზე შეთანხმებას მიაღწიონ | Rustavi2

უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინამ პარტნიორებს შესთავაზა უზრუნველყონ „რუსეთთან ისეთი შეთანხმება, რომელიც კრიტიკული ინფრასტრუქტურის განადგურებას შეაჩერებს“.

როგორც ზელენსკიმ სოციალურ ქსელ X-ზე დაწერა, დაცული უნდა იყოს სასურსათო, ენერგია და სხვა ძირითადი რესურსები, რომლებიც სიცოცხლეს უზრუნველყოფს.

ამის პარალელურად, ზელენსკიმ დასძინა, რომ „უკრაინას არ აქვს იმის რწმენა, რომ რუსეთი მზადაა, დაიცვას რაიმე შეთანხმება“. მან არ დააკონკრეტა, ზუსტად ვისსკენ მიემართებოდა ეს წინადადება.

„თუ ჩვენი პარტნიორები მზად არიან უზრუნველყონ, რომ რუსეთი გულწრფელად შეიკავებს თავს ჩვენს ელექტროსისტემაზე, სხვა ენერგეტიკულ ობიექტებზე, კრიტიკულ ინფრასტრუქტურასა და სურსათის მიწოდების მარშრუტებზე დარტყმებისგან, მაშინ, ცხადია, ჩვენც მზად ვართ, უზრუნველვყოთ ჩვენი მხრიდან დარტყმების შესაბამისი შეჩერება“, - წერს ის და აღნიშნავს, რომ „კრიტიკული ინფრასტრუქტურის მიმართულებით დეესკალაციის ნაბიჯი შესაძლოა მშვიდობისკენ გადადგმული პირველი ნაბიჯი იყოს. ჩვენ პარტნიორებისგან კონკრეტიკას ველოდებით“.

ზელენსკის ეს განცხადება მას შემდეგ გავრცელდა, რაც აშშ-ის პრეზიდენტმა დონალდ ტრამპმა განაცხადა, რომ უკრაინა რუსულ ენერგეტიკულ ობიექტებზე დარტყმების შეწყვეტაზე დათანხმდა.