არ არსებობს ცუდი ერი, კარგი ერი და არ შეიძლება, რომელიმე ერი იყოს საძულველი - ირაკლი კობახიძე რუსოფობიაზე | Rustavi2

საქართველოს პრემიერ-მინისტრმა, ირაკლი კობახიძემ, "რუსთავი 2-ის" ეთერში, გადაცემაში "დებატები", რუსოფობიაზე საუბრისას, განაცხადა, რომ კონკრეტული ერისადმი სიძულვილი მიუღებელია, ხოლო რუსეთის ფედერაციასთან პოლიტიკურ ურთიერთობაში საქართველოს ხელისუფლების პოზიცია უცვლელია და იგი ტერიტორიების 20%-იან ოკუპაციას უკავშირდება.

მისივე თქმით, საზოგადოებაში რუსოფობიის თემის დამკვიდრება ხელოვნური პროცესია:

"რუსოფობიის თემა, ერთდროულად აქტუალურიც და ამასთანავე აბსურდულიც არის. როდესაც გვიწევს იმაზე სერიოზულად საუბარი, რომ კონკრეტული ეროს სიძულვილი არის არასწორი მოვლენა ეს თავისთავად მეტყველებს იმ დისკურსის აბსურდულობაზე, რომელსაც თავს ხელოვნურად გვახვევენ. ნებისმიერი ჯანსაღი საზოგადოებისთვის ეს უნდა იყოს უმარტივესი ნორმა. არ არსებობს ცუდი ერი, კარგი ერი და არ შეიძლება რომელიმე ერი იყოს საძულველი. ეს უმარტივესი მოცემულობაა, რომელიც ნებისმიერი ჯანსაღი საზოგადოებისთვის უნდა იყოს ნორმა. თუმცა, ჩვენ გვიწევს ამ საკითხზე ერთად მსჯელობა იმის გამო, რომ ეს დისკუსია და დისკურსი აბსოლუტურად ხელოვნურად, გარედან მოახვიეს ჩვენს საზოგადოებას თავს.

პირველ რიგში, როდესაც საუბარია რუსოფობიაზე, აქ ერთმანეთისგან უნდა გაიმიჯნოს პოლიტიკური საკითხები, რაც დაკავშირებულია სახელმწიფოებს შორის ურთიერთობასთან, ეს არის ცალკე საკითხი და მეორე საუბარია ურთიერთობებზე ერებს შორის და დამოკიდებულებაზე ერთი ერისა, მეორე ერის მიმართ. ორი სხვადასხვა საკითხია.

რა თქმა უნდა, როდესაც საქმე ეხება პოლიტიკურ დამოკიდებულებას კონკრეტულ სახელმწიფოსთან, საუბარია, ამ შემთხვევაში, რუსეთის ფედერაციაზე, აქ ჩვენ ხელისუფლებას, რომელიც წარმოადგენს ქართველ ხალხს, აქვს ძალიან მკაფიო პოზიცია.

მკაფიო წითელი ხაზები და ძალიან პრინციპული დამოკიდებულება, რაც დაკავშირებულია ჩვენს მთავარ ეროვნულ სატკივართან - ეს არის ჩვენი ტერიტორიების 20%-ის ოკუპაცია.

თქვენ იცით, რომ ჩვენი პოზიცია ამ საკითხზე არის ძალიან პრინციპული. ეს პრინციპული პოზიცია გამოხატულია სხვადასხვა ფორმით და სხვადასხვა პლატფორმაზე, მათ შორის სხვადასხვა საერთაშორისო პლატფორმაზე, ჩვენ გვაქვს აქ წითელი ხაზები,"- აცხადებს ირაკლი კობახიძე.