ქართველი ხალხი იმსახურებს და ნამდვილად დაიბრუნებს ოპოზიციურ ფლანგზე ოკუპირებულ პოლიტიკურ ველს, რასაც ჩვენ გავაკეთებთ - არჩილ გორდულაძე | Rustavi2

პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ, "რუსთავი 2-ის" გადაცემა "დებატებში" განაცხადა, რომ მილიონზე მეტი ამომრჩევლის დავალებაა, სამართლებრივად შეფასდეს "ნაციონალური მოძრაობისა" და მისი სხვადასხვა ფორმით მოქმედი ძალების არაკონსტიტუციური საქმიანობა.

როგორც არჩილ გორდულაძე ამბობს, ეს ამომრჩევლის დავალებაა და ქართული საზოგადოება დაიბრუნებს ოპოზიციურ ფლანგზე ოკუპირებულ პოლიტიკურ ველს.

"ჩვენ გვაქვს ამომრჩევლის დავალება. ჩვენი მხარდაჭერების, მილიონ 120 000-ზე მეტი ამომრჩევლის დავალება არის, რომ ერთხელ და სამუდამოდ სამართლებრივად შევაფასოთ "ნაცმოძრაობის", რომლებიც სხვადასხვა ფორმას იცვლიან ხოლმე, მაგრამ ზნეს არასდროს არ იცვლიან, მათი საქმიანობა, მათი არაკონსტიტუციური მდგომარეობა და ეს გარე მმართველობას დამორჩილებული პირები, რომელთა სურვილიც არის, რომ 2004-2012 წლებში როგორც გარე პატრონების თითის დატკაცუნებაზე იყვნენ და მათ დავალებებს ასრულებდნენ და ახლაც შესრულებას ცდილობენ, იგევენაირად მომავალში არ მოხდეს და რეალურად, დასრულდეს ოკუპაცია.

მე დარწმუნებული ვარ, რომ ქართველი ხალხი დაიბრუნებს ჩვენს ტერიტორიებს, დაიბრუნებს ოკუპირებულ ტერიტორიებს და ქართველი ხალხი იცხოვრებს აფხაზ და ოს დებთან და ძმებთან ერთად. ქართველი ხალხი ნამდვილად დაიბრუნებს ოპოზიციურ ფლანგზე ოკუპირებულ პოლიტიკურ ველს. იმიტომ, რომ ამას ქართველი ხალხი იმსახურებს, რასაც ჩვენ გავაკეთებთ," - აცხადებს არჩილ გორდულაძე.