Brent-ის მარკის ნედლი ნავთობის ფასი 2%-ზე მეტით გაიზარდა მას შემდეგ, რაც აშშ-ის პრეზიდენტმა დონალდ ტრამპმა უარყო ირანის მიერ შეთავაზებული სამშვიდობო შეთანხმება, რომელიც მიზნად ისახავდა, მათ შორის, კონფლიქტის მოგვარებას და ჰორმუზის სრუტის გახსნას. ინფორმაციას Reuters-ი ავრცელებს.

Brent-ის ფასიანი ქაღალდების ფასი 2.60 დოლარით, ანუ 2.49%-ით გაიზარდა და გრინვიჩის დროით 08:03 საათზე ბარელზე 106.92 დოლარი შეადგინა, ხოლო აშშ-ის West Texas Intermediate-ის (WTI) ტიპის ნედლი ნავთობის ფასი ბარელზე 94.49 დოლარი გახდა, რაც 2.08 დოლარით, ანუ 2.25%-ით მეტია.

"როგორც ჩანს, ნავთობის ფასები გაიზარდა მას შემდეგ, რაც პრეზიდენტმა ტრამპმა ირანის სამშვიდობო წინადადება უარყო", - განაცხადა Capital Economics-ის კლიმატისა და სასაქონლო სექტორის უფროსმა ეკონომისტმა, ჰამად ჰუსეინმა.

ირანმა გასულ კვირას ნიუ-იორკში, გაეროს გენერალურ ასამბლეაზე, სამშვიდობო წინადადება წამოაყენა და თქვა, რომ ის ამერიკელებს კატარის შუამავლების მეშვეობით გადაეცათ. ტრამპმა შაბათს განაცხადა, რომ მან ეს გეგმა უარყო, თუმცა კვირას Axios-თან სატელეფონო ინტერვიუში აღნიშნა, რომ ამ კვირაში, აშშ-ის მომლაპარაკებელთა ჯგუფის მონაწილეობით მოლაპარაკებების გაგრძელებას ელოდება.

"მიუხედავად იმისა, რომ ჰორმუზის სრუტის გავლით მიწოდების მოცულობის ზრდა გარკვეულწილად ფასებზე ზეწოლას ამცირებს, საერთო ჯამში, ნავთობის ბაზარი დეფიციტში რჩება", - განაცხადა ჰუსეინმა.