ყურძნის კრეფისა და ჩაბარების პერიოდი პიკურ ფაზაშია - მოსავალი უკვე 7 000-მდე მევენახემ დააბინავა

კახეთში რთველი პიკურ ფაზაშია. მხოლოდ ბოლო ერთ დღეში 14 000-ს ტონაზე მეტი ყურძენი გადამუშავდა. რქაწითელი, საფერავი - საღვინე ჯიშის ყურძენი აქტიურად იკრიფება რეგიონის რვავე მუნიციპალიტეტში. მოსავალი უკვე 7 000-მდე მევენახემ დააბინავა.

8 000-წლიანი ტრადიცია გრძელდება - ოჯახებმა ქვევრები და საწნახელი წინასწარ მოამზადეს. მოსავლის ნაწილი საოჯახო მარნებისთვის იკრიფება, დანარჩენი კი ღვინის ქარხნებში ბინავდება. საწარმოებში უკვე 100 000 ტონა ყურძენია გადამუშავებული.

მთავარი აქცენტი მაღალი ხარისხის კახური ღვინის დაყენებაზე კეთდება. ამ ეტაპზე გადამუშავებული მოსავლის მხოლოდ 0,7 %-ია უხარისხო და მკვახე. უმეტესი ნაწილი კი მაღალი ხარისხის მაჩვენებლებით შეფასდა. რთველის საკოორდინაციო შტაბში 500-მდე ღვინის საწარმოა რეგისტრირებული.

წელს კახეთში რეკორდული რაოდენობის ყურძენი იკრიფება. მევენახეები მოსავალს კერძო კომპანიებთან ერთად, სახელმწიფო საწარმოს კუთვნილ 22 მიმღებ პუნქტში აბარებენ. აქტიურად მუშაობს სუბსიდირების პროგრამაც - ყურძნის ხარისხისა და შაქრიანობის მიხედვით დიფერენცილებული ფასებია დაწესებული.

რთველს 24-საათიან მონიტორინგს სპეციალური საკოორდინაციო შტაბი უწევს. ღვინის ეროვნული სააგენტოს მიზანი ღვინის სექტორის განვითარება და კონკურენტუნარიანი პროდუქტის წარმოებაა. სულ მალე რთველი კახეთიდან მეზობელ რეგიონებში გადაინაცვლებს, მოგვიანებით დასავლეთ საქართველოს მოიცავს და ტრადიციულად რაჭაში დასრულდება.

ავტორი: ირაკლი კოშაძე