
არჩილ გორდულაძე: "ნაციონალური მოძრაობა" ცდილობს ისე წარმოაჩინოს, თითქოს არც მკვლელობები, არც ადამიანების წამება, არც ქონებების ჩამორთმევა ყოფილა და საზოგადოებას ეს ყველაფერი მოეჩვენა, ტყუილებით და უტიფრობით ცდილობს "ნაცმოძრაობა" საკუთარი თავი გადაარჩინოს | Rustavi2
საკონსტიტუციო სასამართლოში 5 პოლიტიკური პარტიის აკრძალვის საკითხის განხილვა ორ საათში განახლდება. მმართველი გუნდის სარჩელზე მსჯელობა ამჯერადაც კითხვა-პასუხის რეჟიმში გაგრძელდება. "ქართულ ოცნებაში" თვლიან, რომ საკონსტიტუციო სასამართლოში მიმდინარე სხდომები ოპოზიციის რეალურ ზრახვებსა და მიზნებს კიდევ ერთხელ აჩვენებს და დარწმუნებული არიან, რომ მათ საჩივარზე საბოლოო პასუხიც სამართლებრივი და სამართლიანი იქნება.
პარლამენტის იურიდიულ საკითხთა კომიტეტის თავმჯდომარის არჩილ გორდულაძის განცხადებით, არც ერთი მტკიცებულება რომ არ წარედგინათ სარჩელის შეტანისას, ისეთი პასუხები გასცეს "ნაციონალური მოძრაობის" წარმომადგენლებმა, უკვე საკმარისია ეს განცხადებები პარტიების ასაკრძალად, ტყუილებით და უტიფრობით ცდილობს "ნაცმოძრაობა" რომ საკუთარი თავი და საკუთარი პარტია გადაარჩინოს:
"ჩვენ როცა სარჩელი შევიტანეთ, სულ რომ არც ერთი მტკიცებულება არ წარგვედგინა, სულ რომ არ ყოფილიყო არც საგამოძიებო კომისიის დასკვნა, "ნაცმოძრაობა" და მათთან დაკავშირებული პარტიების წარმომადგენლებმა ისეთი პასუხები გასცეს სასამართლოს კითხვებს, მარტო სასამართლო სხდომაზე მათ მიერ გაკეთებული განცხადებები უკვე საკმარისია ამ პარტიების ასაკრძალად.
უტიფრობასთან გვაქვს საქმე და მეტი არაფერთან. როდესაც "ნაციონალური მოძრაობა" ცდილობს ისე წარმოაჩინოს, თითქოს 2004-2012 წლებში "ნაცმოძრაობის" პარტია საერთოდ ხელისუფლებაში არ ყოფილა, მიხეილ სააკაშვილი საერთოდ პარტიასთან არ ყოფილა, მხოლოდ ფორმალურად იყო დაკავშირებული.
არც მკვლელობები, არც ადამიანების წამება, არც ქონებების ჩამორთმევა, ეს ყველაფერი არ ყოფილა და თურმე ჩვენ მოვიგონეთ და საზოგადოებას ეს ყველაფერი მოეჩვენა, აი ასეთი ტყუილებით და უტიფრობით ცდილობს "ნაცმოძრაობა" რომ საკუთარი თავი და საკუთარი პარტია გადაარჩინოს", - აცხადებს არჩილ გორდულაძე.
რუსთავი 2
წყარო: rustavi2.ge