ელ-ნინიო ბრუნდება — რა გავლენა ექნება ამ კლიმატურ ფენომენს მსოფლიოში ამინდზე 2026-2027 წლებში #1tvმეცნიერება - 1TV
გლობალური ამინდის პროგნოზის თანახმად, 2026 წლის მეორე ნახევარში დადგება ამინდის ძლიერი ფენომენი ელ-ნინიო, რომელიც გამოიწვევს ცხელ და მშრალ ამინდს აზიის უმეტეს ნაწილში, ჩრდილოეთ და სამხრეთ ამერიკის გარკვეულ ნაწილებში კი ძლიერ ნალექებს.
იაპონიის ამინდის ბიუროს განცხადებით, 70 პროცენტია შანსი იმისა, რომ ელ-ნინიო ჩრდილოეთ ნახევარსფეროს ზაფხულის სეზონზე გამოჩნდეს. ჩინეთის შესაბამის უწყებათა ცნობით კი, ამ ქვეყანაში ელ-ნინიოს შედეგებს წლის ბოლოსთვის ელოდებიან, თავად მოვლენა კი მაისში გამოჩნდება.
აშშ-ის კლიმატის პროგნოზის ცენტრის შეფასებით, 61 პროცენტია იმის შანსი, რომ ელ-ნინიო მაისიდან ივლისამდე პერიოდში წარმოიქმნას.
ავსტრალიის მეტეოროლოგიური ბიურო ქვეყნის აღმოსავლეთ რეგიონებში გრძელვადიან წვიმებს მაისიდან აგვისტომდე პერიოდში ვარაუდობს.
რა არის ელ-ნინიო და ლა-ნინია?
ელ-ნინიო და ლა-ნინია წყნარი ოკეანის ტროპიკული ნაწილის ერთი და იმავე კლიმატური სისტემის საპირისპირო ფაზებია.
ელ-ნინიო არის წყნარი ოკეანის ეკვატორული ზონის ცენტრალური და აღმოსავლეთ ნაწილის ზედაპირის წყლების ბუნებრივად უჩვეულოდ გათბობა.
ხდება მაშინ, როცა ატმოსფერული წნევის ცვლილებები ასუსტებს ან თუნდაც უკუაქცევს ჩვეულებრივ სტაბილურ აღმოსავლეთის პასატურ ქარებს, რაც დასავლეთ წყნარ ოკეანეში დაგროვილი თბილი წყლების აღმოსავლეთისკენ გადაადგილებას უწყობს ხელს; შედეგად კი ხდება სითბოს გადანაწილება იცვლება გლობალური ამინდი სურათი.
ლა-ნინია წარმოიქმნება მაშინ, როცა პასატური ქარები ძლიერდება, უფრო მეტი თბილი წყალი გადააქვს დასავლეთ წყნარ ოკეანეში და ცივ წყალს აღმოსავლეთით გადაადგილების საშუალება ეძლევა; შედეგად, ზღვის ტემპერატურა ნორმალურზე დაბლა ჩამოდის.