ბადრი ჯაფარიძე: ეს სასამართლო პროცესი თვითონ არის ჩვენი სახელმწიფოს საბოტაჟი | TV პირველი

ეს სასამართლო პროცესი თვითონ არის ჩვენი სახელმწიფოს საბოტაჟი, რადგან ასეთი ტიპის შეთითხნილი, მოგონილი პროცესი მხოლოდ იმიტომ, რომ პოლიტიკური ლიდერების დევნა მიმდინარეობდეს, ძირს უთხრის ჩვენს სახელმწიფოს, - ამის შესახებ „ძლიერი საქართველო - ლელოს“ ერთ-ერთმა ლიდერმა, ბადრი ჯაფარიძემ საქალაქო სასამართლოსთან პროცესის დაწყებამდე განაცხადა.

მისი თქმით, აღნიშნული პროცესი ძალიან დიდ ზიანს აყენებს სახელმწიფოს და მის რეპუტაციას.

ეს სასამართლო პროცესი არის საბოტაჟი ჩვენი სახელმწიფოსი, რადგან ასეთი ტიპის შეთითხნილი, მოგონილი პროცესი, მხოლოდ იმიტომ რომ მიმდინარეობდეს დევნა პოლიტიკური ლიდერების, ძირს უთხრის ჩვენ სახელმწიფოს, შესაბამისად, ძალიან დიდი ზიანს აყენებს, ჩვენ სახელმწიფოს, მის რეპუტაციას და ამიტომაც არის ეს სასამართლო პროცესი ძალიან დამაზიანებელი და მე ვიტყოდი, პირდაპირი საბოტაჟი ჩვენი სახელმწიფოსი, - განაცხადა ჯაფარიძემ.

ცნობისთვის, ე.წ. საბოტაჟის საქმეზე გენერალურმა პროკურატურამ მიხეილ სააკაშვილს, გიორგი ვაშაძეს, ნიკა გვარამიას, ნიკა მელიას, ზურაბ გირჩი ჯაფარიძეს, ელენე ხოშტარიას, მამუკა ხაზარაძესა და ბადრი ჯაფარიძეს ბრალდება წარუდგინა

ვის რას ედავება პროკურატურა:

მიხეილ სააკაშვილი - ბრალდება წარედგინება საქართველოს სისხლის სამართლის კოდექსის 317-ე მუხლით - საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდება. სააკაშვილს 3 წლამდე პატიმრობა ემუქრება. ზურაბ ჯაფარიძე ბრალდება წარედგინებათ საქართველოს სისხლის სამართლის კოდექსის 318-ე მუხლის პირველი ნაწილით და 319-ე მუხლით - საბოტაჟი და უცხო ქვეყნისათვის მტრულ საქმიანობაში დახმარება. 7-დან 15 წლამდე პატიმრობა ემუქრება. გიორგი ვაშაძე - ბრალდება წარედგინებათ საქართველოს სისხლის სამართლის კოდექსის 318-ე მუხლის პირველი ნაწილით და 319-ე მუხლით - საბოტაჟი და უცხო ქვეყნისათვის მტრულ საქმიანობაში დახმარება. ვაშაძეს 7-დან 15 წლამდე პატიმრობა ემუქრება. ელენე ხოშტარია - ბრალდება წარედგინება საქართველოს სისხლის სამართლის კოდექსის 318-ე მუხლის პირველი ნაწილით, 319-ე მუხლით და 321-ე პრიმა მუხლის პირველი ნაწილით - საბოტაჟი, აღნიშნული დანაშაულისთვის მატერიალური რესურსების მიწოდება და უცხო ქვეყნისათვის მტრულ საქმიანობაში დახმარება. ხოშტარიას 7-დან 15 წლამდე პატიმრობა ემუქრება. ნიკა გვარამია, ნიკა მელია, მამუკა ხაზარაძე და ბადრი ჯაფარიძე - ბრალდება წარედგინებათ საქართველოს სისხლის სამართლის კოდექსის 318-ე მუხლის პირველი ნაწილით - საბოტაჟი. ბრალსი დამტკიცების შემთხვევაში ოთხივე პოლიტიკოსს 2-დან 4 წლამდე პატიმრობა ემუქრება.