დიუშენის კუნთოვანი დისტროფიით დაავადებული ბავშვების მშობლებმა ღამე კვლავ მთავრობის ადმინისტრაციასთან გაათენეს | TV პირველი

დიუშენის კუნთოვანი დისტროფიით დაავადებული ბავშვების მშობლებმა ღამე კვლავ მთავრობის ადმინისტრაციასთან გაათენეს.

მოთხოვნა უცვლელია: სახელმწიფომ დააფინანსოს და შემოიტანოს ქვეყანაში წამლები, რომლებიც მშობლების თქმით, მათი შვილების სიცოცხლეს გაახანგრძლივებს და გააუმჯობესებს.

მშობლებთან ერთად კანცელარიასთან ღამეს ათევენ სტუდენტები და სამოქალაქო აქტივისტებიც, რომლებიც უწყვეტი პროტესტის მონაწილეებს სრულ მხარდაჭერას უცხადებენ.

მე-9 დღე გათენდა, რაც მშობლები ითხოვენ საკუთარი შვილებისთვის წამალს, კანცელარიასთან ათენებენ და აღამებენ, რომ საკუთარ შვილებს გაუხანგრძლივონ სიცოცხლე. სტუდენტებიც აქ ვართ, ღამე ვრჩებით ხოლმე მშობლებთან და თანაგრძნობას, სოლიდარობას ვუცხადებთ. მე მგონია, რომ როცა ღარიბაშვილს ოქროს ზოდები და მილიონები ამოუღეს სახლიდან, კალაძე და სხვები კი ვიცით რამდენ ფულს ხარჯავენ საკუთარი გართობისთვის, აქ, ამ ქვეყანაში პრობლემა არ უნდა იყოს იმაზე, რომ წამალი მისცენ ბავშვებს. საზოგადოებას მოვუწოდებ ამ ხალხთან მოხვიდეთ, კანცელარიასთან არიან ყოველდღე, გამოუცხადოთ მხარდაჭერა და ამაზე ვისაუბროთ იმიტომ, რომ ისე არ მოგვარდება ეს პრობლემა," - ამბობს სტუდენტი ლუკა ხიზაძე.

ცნობისთვის, უწყვეტი პროტესტის პარალელურად ყოველ კვირა დღეს რუსთაველის მეტროდან კანცელარიამდე, 17:00 საათზე საპროტესტო მსვლელობა გაიმართება. ხოლო ყოველ ორშაბათს, 17:00 საათზე, მთავრობის ადმინისტრაციასთან ჩანიშნულია აქცია.