კალაძის დაანონსებული აპრილი გადავადდა - "ოცნება" შტატებთან ურთიერთობის დასალაგებლად ახალ თარიღს ასახელებს | TV პირველი
მოვა მაისი! - კალაძის დაანონსებული აპრილი ისევ გადავადდა. ქართული ოცნება მაისს და ამერიკელებს ერთად ელოდება. თუმცა მოვა თუ არა მაისთან ერთად ურთიერთობების ახალი ფურცელი, არავინ იცის. ვისი იმედი აქვს ივანიშვილის გუნდს? - "ტვ პირველის" ინფორმაციით, მაისში საქართველოში ვიზიტს სახელმწიფო დეპარტამენტის წარმომადგენელი გეგმავს.
აპრილი მაისმა ჩაანაცვლა. ირაკლი კობახიძე ფსონს ახალ თარიღზე დებს, არადა მოლოდინი აპრილში გაგვიჩინეს. ჯერ კახა კალაძემ შემდეგ კი ლევან მახაშვილმა დაგვიანონსეს, რომ შტატებთან ურთიერთობებში გარღვევა სწორედ ამ თვეში ექნებოდათ.
ის ვისაც "ქართული ოცნება" ასე ელოდება სახელმწიფო მდივნის თანაშემწის მოადგილეა. სონატა კოლტერს უკავია თანამდებობა, რომელსაც კახა კალაძე წლების წინ დასცინოდა.
სონატა კოლტერს ამერიკის საგარეო უწყებაში ჩაბარებული აქვს რუსეთი, კავკასია, ევროპის უსაფრთხოება და პოლიტიკური საქმეები. თბილისში ვიზიტისას ის შეხვდება როგორც ქართული ოცნებას, ასევე ოპოზიციას.
"ტვ პირველის" კითხვის პასუხად ამერიკის საელჩო გვწერს, რომ ამ ეტაპზე გამოსაცხადებელი ვიზიტი არ აქვთ, თუმცა ჩვენი ინფორმაციით სახელმწიფო მდივნის წარმომადგენელი საქართველოში მაისის დასაწყისში ჩამოვა.