"ენმ-ში თავმჯდომარეობა არ უქმდება" - ჟორჟოლიანი ასახელებს არჩევნების თარიღს და განმარტავს „რეფორმატორთა საბჭოს" ფუნქციას | TV პირველი

"თავმჯდომარეობა არ უქმდება "ნაციონალურ მოძრაობაში" - ამის შესახებ ნანუკა ჟორჟოლიანმა ინგა გრიგოლიას "რეაქციისთვის" მიცემულ ექსკლუზიურ ინტერვიუში განაცხადა, როთაც ენმ-ის თავმჯდომარეობის მოვალეობის შემსრულებელს, თინა ბოკუჩავას უპასუხა.

მისი თქმით, გაუკვირდა, რომ ეს ბოკუჩავამ არ იცოდა, რახდან ამ დეტალებზე პარტიის შიგნით მსჯელობა აქტიურად მიმდინარეობს.

როგორც ჟორჟოლიანი განმარტავს, მხარდამჭერები ენმ-ს თავმჯდომარეს პირდაპირი წესით 6 თვეში აირჩევენ, მანამდე კი პარტიაში იქნება დროებითი მმართველობის საბჭო.

რაც შეეხება „რეფორმატორთა საბჭოს" ჟურნალისტის განცხადებით, ის პარტიისგან დამოუკიდებელი გაერთიანებაა, რომელიც რეკომენდაციების მისცემს "ერთიან ნაციონალურ მოძრაობას".

ყველამ იცის პარტიაში, რომ თავმჯდომარეობის გაუქმება დღის წესრიგში საერთოდ არ დგას. აქ არის საუბარი 6 თვიან დროებით მართველობის ჯგუფზე, ანუ ის 6 თვე, ვიდრე არჩევნები ჩატარდება. აქ მნიშვნელოვანია, რომ არჩევნები ჩატარდება პირდაპირი წესით. თქვენ იცით, რომ ორი ფორმატის არჩევნებია, ერთი - როდესაც მხოლოდ შიდა პარტიული წევრები [პოლიტიკური საბჭო] იღებენ მონაწილეობას და მეორე, როცა ამომრჩეველს ეძლევა შესაძლებლობა, [ხმა მისცეს კანდიდატს]. ასე მოხდა ლევან ვარშალომიძესა და ნიკა მელიას შემთხვევაში, ამ წესით ჩატარდა არჩევნები ლევან ხაბეიშვილსა და ნიკა მელიას შორის. ეს წესი დაირღვა ერთადერთხელ - როცა თინა [ბოკუჩავა] გახდა თავმჯდომარე"- თქვა ჟორჟოლიანმა.

პატიმრობაში მყოფი მესამე პრეზიდენტი მიხეილ სააკაშვილი აცხადებს, რომ შეიქმნება „რეფორმატორთა საბჭო“, რომელსაც ის თავმჯდომარის როლში უხელმძღვანელებს, ხოლო ნანუკა ჟორჟოლიანი იქნება საბჭოს აღმასრულებელი მდივანი.

როგორ განვითარდა ენმ-ში მოვლენები:

პატიმრობაში მყოფმა მიხეილ სააკაშვილმა "ნაციონალურ მოძრაობაში" რადიკალური ცვლილებები 10 ივნისს დააანონსა და ნანუკა ჟორჟოლიანს სრული ნდობა გამოუცხადა. 11 ივნისს ჟორჟოლიანმა თქვა, რომ მას სააკაშვილი პარტიის თავმჯდომარეობას სთავაზობდა. თინა ბოკუჩავამ 16 ივნისს პოლიტიკური ჭორაობა უწოდა ინფორმაციას, რომლის მიხედვითაც, სააკაშვილი ჟორჟოლიანს მის თანამდებობას სთავაზობდა; 17 ივნისს მიხეილ სააკაშვილმა დაწერა, რომ მისი თავმჯდომარეობის კანდიდატი ნანუკა ჟორჟოლიანია. რამდენიმე საათში ამ განცხადებას იმპულსური და არათანმიმდევრული უწოდა.