თავდაცვის ექს მინისტრის, ჯუანშერ ბურჭულაძისთვის საპროცესო შეთანხმებაზე ირაკლი კობახიძე პირველ კომენტარს აკეთებს.

„ოცნების“ ლიდერი ამბობს, რომ ყველა სამთავრობო სტრუქტურას აქვს მასთან კომუნიკაცია და ამ შემთხვევაშიც ასე მოხდა.

რაც შეეხება სამოქალაქო დავას - კობახიძე ამბობს, რომ “ამასთან დაკავშირებითაც ექნება კოორდინაცია“

ეს არის საპროცესო გარიგებების ბუნება - როდესაც იდება საპროცესო გარიგება, ეს არ ნიშნავს იმას, რომ ბრალი მცირდება. უბრალოდ თანამშრომლობა კონკრეტულ საქმესთან დაკავშირებით, საპროცესო გარიგება არის საფუძველი სასჯელის შემსუბუქებისთვის. არა ბრალის გაქარწყლების, ან განეიტრალებისთვის, არამედ სასჯელის შემცირებისთვის, ეს არის საპროცესო გარიგების ბუნება. ზოგადად, ყველა სამთავრობო სტრუქტურას აქვს კოორდინაცია, ჩემთან, რაც შეეხება სამოქალაქო დავას, ამასთან დაკავშირებითაც გვექნება კოორდინაცია, და მიღებული იქნება შესაბამისი გადაწყვეტილება, რაც არის სწორი, სამართლებრივად, იმას გავაკეთებთ, - განაცხადა კობახიძემ.

რამდენიმე წუთის წინ ცნობილი გახდა, რომ ჯუანშერ ბურჭულაძეს საპროცესო შეთანხმება იმ საქმეზეც გაუფორმდა, რომელზეც 10-წლიანი პატიმრობა ჰქონდა მისჯილი. მასთან ერთად საპროცესო შეეხო ექს-მინისტრის გარემოცვასაც. საპროცესო გაფორმდა ბურჭულაძის ყოფილ მოადგილესთან, გიორგი ხაინდრავასთან და ვასილ მხეიძესთან, რომელიც თავდაცვის ექს-მინისტრის ცოლის ძმაა. შეთანხმების თანახმად, ვასილ მხეიძე და გიორგი ხაინდრავა პენიტენციურ დაწესებულებას სექტემბრის ბოლოს დატოვებენ, რაც შეეხება ჯუანშერ ბურჭულაძეს, ის ციხეს ზუსტად 2 წელში დატოვებს. საპროცესო შეთანხმების თანახმად, ბურჭულაძეს სასჯელის სახით განესაზღვრა 5 წლით თავისუფლების აღკვეთა, საიდანაც 3 წელს მოიხდის სასჯელაღსრულების დაწესებულებაში, ხოლო 2 წელი ჩაეთვლება პირობით, იმავე გამოსაცდელი ვადით. მასვე, დაეკისრა ჯარიმა 1 000 000 ლარის ოდენობით. მასვე სახელმწიფოს სასარგებლოდ ჩამოერთვა უსასყიდლოდ სხვადასხვა სახის ქონება. რაც შეეხება ვასილ მხეიძეს, მას 4 წლითა და 2 თვით თავისუფლების აღკვეთა მიესაჯა, საიდანაც 1 წელს და 2 თვეს მოიხდის სასჯელაღსრულების დაწესებულებაში, ხოლო 3 წელი ჩაეთვლება პირობით, იმავე გამოსაცდელი ვადით. მასვე, დაეკისრა ჯარიმა 100 000 ლარის ოდენობით, სახელმწიფოს სასარგებლოდ უსასყიდლოდ ჩამოერთმევა ნივთმტკიცებად ამოღებული საგნები - რამდენიმე მილიონის ღირებულების უაქციზო სიგარეტი და მის დასამზადებლად არსებული მასალა, ასევე თუთუნი. რაც შეეხება გიორგი ხაინდრავას, მასაც 4 წლითა და 2 თვით თავისუფლების აღკვეთა მიესაჯა, საიდანაც 1 წელს და 2 თვეს მოიხდის სასჯელაღსრულების დაწესებულებაში, ხოლო 3 წელი ჩაეთვლება პირობით, იმავე გამოსაცდელი ვადით. მასვე, დაეკისრა ჯარიმა 100 000 ლარის ოდენობით. მხარეებს შორის მიღწეული საპროცესო შეთანხმება მოსამართლეთა კოლეგიამ, პაატა სილაგაძის თანათავმჯდომარეობით დაამტკიცა.