„ეს არა სამართლებრივი, არამედ პოლიტიკური სარჩელია“ - გახარიას გუნდი "ოცნებას" პასუხობს

„გახარია საქართველოსთვის“ „ქართული ოცნების“ განახლებულ საკონსტიტუციო სარჩელს, რომლითაც მმართველი პარტია მათ აკრძალვასაც ითხოვს, პოლიტიკურ დევნად აფასებს. პარტიის წარმომადგენლები აცხადებენ, რომ მათი საქმიანობის არაკონსტიტუციურად ცნობისთვის სამართლებრივი საფუძველი არ არსებობს და სარჩელის მიზანი პოლიტიკური ოპონენტების ჩამოშორებაა.

პოლიტიკური ოპონენტის და პოლიტიკური პარტიის დევნისთვის დაწერილი ეს სარჩელი არის არაკონსტიტუციური. ამ სარჩელში ვერ იქნება ვერაფერი სამართლებრივი არგუმენტი ჩვენს წინააღმდეგ, იმიტომ, რომ ჩვენ მართლები ვართ როგორც კანონის წინაშე, ისე ხალხის წინაშე. რაიმე ლოგიკურ და არგუმენტირებულ ქმედებას, რა თქმა უნდა, მათგან არ ველოდებით, ამიტომ ლოგიკური და არგუმენტირებული მოლოდინის ანალიზი ამას არ უკეთდება იქიდან გამომდინარე, რომ არიან კონსტიტუციის ჩარჩოებიდან სრულიად გასული. ეს მხოლოდ და მხოლოდ მეტყველეს მათ შიშზე, იმ შიშზე, რომ ქართველი ხალხი კარგად ხედავს უკვე ყოველდღიურად მათ სახეს, - ამბობს ვიკა ფილფანი.

გიორგი ჭანტურია ამბობს, რომ სარჩელს ჯერ არ გაცნობიან, თუმცა აცხადებს, რომ პარტიას კანონით გათვალისწინებული ვალდებულებები შესრულებული აქვს და წარმოდგენილია როგორც პარლამენტში, ისე საკრებულოებში. მისი შეფასებით, სარჩელი სამართლებრივი კი არა, პოლიტიკური ხასიათისაა.

"ქართული ოცნება" ყველაფერს აკეთებს, რომ ამ ქვეყანაში განსხვავებული აზრი ჩაახშოს. ვერანაირი სამართლებრივი არგუმენტი ამ სარჩელში წაროადგენილი ვერ იქნება ჩვენს არაკონსტიტუციურობასთან დაკავშირებით, იმიტომ, რომ ჩვენს პარტიას ყველა კანონით და ჩვენი მოქალაქეებს წინაშე ყველანაირი ვალდებულება შესრულებული აქვს. ჩვენი პარტია, იცით, რომ წარმოდგენილია პარლამენტში, წარმოდგენილია საკრებულეობში, შესაბამისად, ეს არა სამართლებრივი, არამედ პოლიტიკური სარჩელია და პოლიტიკური სარჩელი, რომელიც განკუთვნილია პოლიტიკური პარტიის და ოპონენტების განადგურებაზე, თავად არის არაკონსტიტუციური, - ამბობს გიორგი ჭანტურია.

განახლებული საკონსტიტუციო სარჩელი, რომელსაც პარტია „გახარია საქართველოსთვის“ დაემატა, ხელმოწერილია და საკონსტიტუციო სასამართლოში დღეს შევა - ამის შესახებ ინფორმაცია შალვა პაპაუაშვილმა განაცხადა.

მისივე თქმით, პარტია „გახარია საქართველოსთვის“ მათი წარმოდგენით არის ანტიკონსტიტუციური და შესაბამისი არგუმენტაცია წარმოდგენილია განახლებულ სარჩელში.