1-ელი ივლისიდან, სესხის გამცემ ორგანიზაციებს ₾1 მილიონამდე სესხის მხოლოდ ლარში გაცემა შეეძლებათ

საქართველოს ეროვნულმა ბანკმა მათ ვისაც ეროვნულ ვალუტაში აქვს შემოსავალი 1,000,000 ლარამდე სავალუტო სესხის აღება სესხის გამცემი ორგანიზაციებიდანაც შეუზღუდა - შესაბამისი გადაწყვეტილება საკანონმდებლო მაცნეზე დღეს გამოქვეყნდა. აღნიშნული შეზღუდვა სებ-მა ბანკებს 6 მაისს დაუდგინა ახლა კი ის სესხის გამცემ ორგანიზაციებზეც გავრცელდა.

აქამდე მოქმედი ლიმიტით, სავალუტო დაკრედიტების ლიმიტი არაჰეჯირებული მსესხებლებისთვის 750,000 ლარს შეადგენდა.

"სესხის გამცემი ორგანიზაციების მიერ 1 000 000 (ერთი მილიონი) ლარამდე სესხი/საბანკო კრედიტი უნდა გაიცეს მხოლოდ ლარით.

სესხების/საბანკო კრედიტების გადასახდელად საკმარის შემოსავალს მსესხებელი სრულად იღებს სესხის/საბანკო კრედიტის შესაბამის ვალუტაში. შემოსავალი ჩაითვლება სესხის/საბანკო კრედიტის შესაბამის ვალუტაში მიღებულად, თუ შემოსავლის წყარო სესხის/საბანკო კრედიტის ვადიანობის განმავლობაში არ არის მგრძნობიარე გაცვლითი კურსის მერყეობის მიმართ და მისი წარმოშობის წყარო დაკავშირებულია ისეთ ქვეყანასთან, რომელშიც სესხის/საბანკო კრედიტის ვალუტა არის ეროვნული ვალუტა. ამ ქვეპუნქტის მიზნებისთვის, სამეწარმეო მიზნობრიობით გაცემული სესხის/საბანკო კრედიტის შემთხვევაში, სესხის გამცემი ორგანიზაციის შიდა პოლიტიკა-პროცედურებით განსაზღვრული სესხის/საბანკო კრედიტის მომსახურების ჯანსაღი კოეფიციენტი სრულად დაცული უნდა იყოს სესხის/საბანკო კრედიტის ვალუტაში არსებული შემოსავლით,"- ნათქვამია სებ-ის პრეზიდენტის ბრძანებაში.

ეროვნულმა ბანკმა სავალუტო სესხების ზღვარი ბოლოს 2025 წლის 1 აგვისტოს გაზარდა 750,000 ლარამდე, იქამდე კი 2025 წლის 1 იანვრიდან 1 აგვისტომდე 500,000 ლარის ზღვარი მოქმედებდა. 2024 წელს კი ეს ზღვარი 200,000 ლარიდან 400,000 ლარამდე გაზარდა, შესაბამისად დღეს მიღებული გადაწყვეტილება ამ პოლიტიკის ნაწილია და ის ზღვრის კიდევ 250,000 ლარით ზრდას მოიცავს.