"1 კგ ქართული ხიზილალა 180 ლარი, იმპორტირებული 300 ლარამდე ღირს" - "ქართული ხიზილალა"

გორში მდებარე ადგილობრივი თევზისა და ზღვის პროდუქტების მწარმოებელი კომპანია "ქართული ხიზილალა" აცხადებს, რომ ბაზარზე ხიზილალაზე მოთხოვნა მაღალია და წლის ბოლოს პროდუქტი ხშირად დეფიციტურიც ხდება.

კომპანიის დამფუძნებელმა ალექსანდრე დადიანიძემ BM.GE-სთან განმარტა, რომ ობიექტი როგორც ადგილობრივ, ისე იმპორტირებულ ხიზილალას ყიდის.

„ხიზილალის მიმართულებით გვაქვს წითელი ხიზილალა და ასევე ზუთხის ხიზილალა. 1 კილოგრამი ჩვენი ადგილობრივი ხიზილალა 180 ლარი ღირს, ხოლო უცხოური დაახლოებით 250-დან 300 ლარამდე მერყეობს. ადგილობრივთან ერთად უცხოური ხიზილალასაც ვყიყიდთ“, - აცხადებს ალექსანდრე დადიანიძე და დასძინა, რომ პროდუქციის რეალიზაცია საკუთარ ბუტიკურ მარკეტსა და რესტორნებში ხდება.

ამასთან, როგორც ის აღნიშნავს, პროდუქციაზე ფასები დაახლოებით 15%-ით გაიზარდა, რაც გაზრდილ საოპერაციო ხარჯებსა და ხელფასების მატებას უკავშირდება. „ფასებმა დაახლოებით 15%-ით მოიმატა, რაც ყველაფრის გაძვირებით, ასევე ხელფასების მომატებით აიხსნება“, - აღნიშნავს დადიანიძე.

ამ დროისთვის კომპანია დაახლოებით 100 ადამიანს ასაქმებს, რომლებიც, მისი თქმით, სრულად ადგილობრივი კადრები არიან.

ცნობისთვის, ოფიციალური სტატისტიკის მიხედვით, 2026 წლის იანვარ-მარტში საქართველოში ზუთხის შავი ხიზილალას იმპორტი გაძვირდა - ქვეყანაში $100 800-ის ღირებულების 200 კილოგრამი პროდუქტი შემოვიდა, მაშინ როცა 2025 წლის ანალოგიურ პერიოდში იმპორტის ღირებულება $68 600 იყო, მოცულობა კი უცვლელი დარჩა. წლიურად შავი ხიზილალას იმპორტის ღირებულება 46.9%-ით გაიზარდა, ხოლო ვინაიდან მოცულობები უცვლელია, ეს ნიშნავს, რომ პროდუქტი გაძვირდა. მთავარი იმპორტიორი ქვეყანა ჩინეთი იყო. ამის პარალელურად, წითელი ხიზილალას იმპორტი მნიშვნელოვნად შემცირდა - 2026 წლის პირველ კვარტალში ქვეყანაში $282 600-ის ღირებულების 13 200 კილოგრამი პროდუქტი შემოვიდა, მაშინ როცა 2025 წლის ანალოგიურ პერიოდში იმპორტი $432 900-ს, ხოლო მოცულობა 106 100 კილოგრამს შეადგენდა. შედეგად, წითელი ხიზილალას იმპორტის მოცულობა 87.5%-ით, ხოლო ღირებულება 34.7%-ით შემცირდა. მთავარი იმპორტიორი ქვეყანა რუსეთი იყო.