10 სექტორი, სადაც 2026 წელს გლობალურად ყველაზე დიდი მოცულობის FDI დაანონსდა

2026 წლის პირველ ნახევარში გლობალურმა ინვესტორებმა საერთაშორისო "გრინფილდ" (ახალ) პროექტებში დაახლოებით 538 მილიარდი დოლარის ინვესტიცია დააანონსეს. კაპიტალის ამ ნაკადის მთავარ მამოძრავებელ ძალად ხელოვნური ინტელექტის (AI) ინფრასტრუქტურა იქცა.

"fDi Intelligence"-ის მონაცემებზე დაყრდნობით, წარმოგიდგენთ 10 წამყვან სექტორს, სადაც 2026 წლის იანვარ-ივნისში, გლობალურად ყველაზე მეტი მოცულობის პირდაპირი უცხოური ინვესტიციები (FDI) დაანონსდა.

მონაცემები მოიცავს მხოლოდ "გრინფილდ" ინვესტიციებს - ანუ კაპიტალდაბანდებას სრულიად ახალ პროექტებსა და საწარმოებში, და გამორიცხავს შერწყმა-შესყიდვებსა (M&A) და კომპანიათაშორის სესხებს.

მსოფლიოს 10 უმსხვილესი სექტორი ახალი ინვესტიციების მიხედვით (2026 წლის I ნახევარი):

სექტორი კაპიტალური დანახარჯები ($ მლრდ) 1 კომუნიკაციები 139.3 2 განახლებადი ენერგია 73.3 3 ქვანახშირი, ნავთობი და გაზი 44.7 4 ნახევარგამტარები 38.8 5 ტრანსპორტირება და დასაწყობება 24.9 6 უძრავი ქონება 23.9 7 ლითონები და მეტალურგია 23.7 8 სამრეწველო აღჭურვილობა 14.6 9 ელექტრონული კომპონენტები 13.7 10 პროგრამული უზრუნველყოფა და IT სერვისები 13.7

რატომ ლიდერობს კომუნიკაციების სექტორი გლობალურ ინვესტიციებში?

2026 წლის პირველ ექვს თვეში ბიზნესმა კომუნიკაციების სექტორში 139.3 მილიარდი დოლარის ახალი კაპიტალის დაბანდება დააანონსა. ეს თითქმის იმდენივეა, რამდენიც რეიტინგში მომდევნო სამ უმსხვილეს სექტორში ერთად აღებული.

ამ მიმართულების მთავარი მამოძრავებელი მონაცემთა ცენტრებია, რომლებმაც 131 მილიარდ დოლარზე მეტი საინვესტიციო დაპირება მიიზიდა.

კომპანიები მილიარდობით დოლარს დებენ მონაცემთა ცენტრებში, რათა ხელი ხელოვნური ინტელექტის ბუმს შეუწყონ. ეს ციფრული ინფრასტრუქტურა იმ გამოთვლით სიმძლავრეებს უზრუნველყოფს, რაც დიდი AI მოდელების სწავლებისა და მუშაობისთვის არის აუცილებელი.

მონაცემთა ცენტრებში დაანონსებული ინვესტიციების თითქმის მეოთხედი ერთ გარიგებაზე მოდის: 2026 წლის მაისში "SoftBank"-მა საფრანგეთში მონაცემთა ცენტრების მოსაწყობად 50 მილიარდ დოლარზე მეტი გამოყო. იაპონური ტექნოლოგიური გიგანტი გეგმავს, რომ 2031 წლიდან ქვეყანას 3.1 გიგავატის სიმძლავრის მონაცემთა ცენტრები მიაწოდოს, რაც ევროპაში ამ ტიპის ყველაზე მასშტაბური ინვესტიცია იქნება.

საერთო ჯამში, რეიტინგი ცხადყოფს, რომ AI ინვესტიციების ბუმი თავად მონაცემთა ცენტრების საზღვრებს ბევრად სცილდება. ნახევარგამტარები, ელექტროენერგიის გამომუშავება, ელექტრონული კომპონენტები, სამრეწველო აღჭურვილობა და პროგრამული უზრუნველყოფა - ყველა ეს მიმართულება წამყვან პოზიციებზეა, რაც გამოთვლით სიმძლავრეებზე მზარდი მოთხოვნის გარშემო შექმნილი ინფრასტრუქტურის მასშტაბებს უსვამს ხაზს.