15-წლიანი პაუზის შემდეგ, სირიაში Visa და Mastercard-ის სისტემები ამოქმედდა

სირია გლობალურ საგადასახადო სისტემებს დაუბრუნდა - საერთაშორისო ქსელების მეშვეობით ელექტრონული გადახდების პირველი სატესტო ოპერაცია დამასკოში გამართულ ოფიციალურ ცერემონიაზე შესრულდა.

აღნიშნული პროცესი აშშ-ის სანქციების გაუქმებით და სირიის ცენტრალური ბანკის ოფიციალური გადაწყვეტილებით გახდა შესაძლებელი. მარეგულირებელმა ადგილობრივ ბანკებსა და ელექტრონული გადახდების კომპანიებს უფლება მისცა, ისეთ გლობალურ გიგანტებთან ითანამშრომლონ, როგორებიც Visa და Mastercard-ია. შესაბამისი სამართლებრივი ჩარჩოს შექმნით, ცენტრალურმა ბანკმა ადგილობრივ ფინანსურ ინსტიტუტებს გზა გაუხსნა, საერთაშორისო საგადასახადო ოპერაციები საკუთარ სისტემებში დანერგონ.

სირიის კომუნიკაციებისა და ინფორმაციული ტექნოლოგიების მინისტრის, აბდულსალამ ჰაიკალის განცხადებით, ეს ნაბიჯი ქვეყნის ციფრული ფინანსური ინფრასტრუქტურის გაძლიერებასა და მის საერთაშორისო სტანდარტებთან შესაბამისობაში მოყვანას ისახავს მიზნად.

როგორც ირკვევა, გლობალური სერვისების პარალელურად, სამინისტრომ Paymera-ს პლატფორმაც აამოქმედა, რომელიც საერთაშორისო ბარათების სისტემებთან დაკავშირებული პირველი ადგილობრივი საგადასახადო ქსელია.

საყურადღებოა, რომ დასახელებული სერვისების აღდგენა ქვეყნისთვის ხანგრძლივი ფინანსური იზოლაციის დასასრულს ნიშნავს. სირია გლობალურ ფინანსურ სისტემას 2011-2012 წლებში დაწესებული მკაცრი საერთაშორისო სანქციების შედეგად გამოეთიშა. აღნიშნული ზომების გამო, გლობალურმა საბანკო ქსელებმა მომსახურება შეაჩერეს, რაც ადგილობრივ ბაზარზე მხოლოდ ახლახან განახლდა.