2020-2025 წლებში აუდიტის სამსახურმა 3 200-ზე მეტი რეკომენდაცია გასცა - როგორია შესრულება?

2020-2025 წლებში სახელმწიფო აუდიტის სამსახურმა 3,200-ზე მეტი რეკომენდაცია გასცა, საიდანაც სრულად 49%-ია შესრულებული. ამის შესახებ სამსახურის წლიურ ანგარიშშია აღნიშნული.

ანგარიშის თანახმად, ნაწილობრივ შესრულებულია რეკომენდაციების − 30%. რეკომენდაციების 11% − მიმდინარეა და ორგანიზაციების მიერ მათი საბოლოო შესრულებისთვის დაგეგმილი თარიღი ჯერ არ დამდგარა, ხოლო 10% − შეუსრულებელია.

შესრულების დადებითი ტენდენცია შეინიშნება ცენტრალური ხელისუფლების დონეზე, რომელიც ბოლო ხუთი წლის განმავლობაში 47%-დან 61%-მდე გაიზარდა. სამსახურის თანახმად, ამას ხელი შეუწყო პარლამენტთან მჭიდრო კოორდინაციამ და ანგარიშების აუდიტის ჯგუფის ფორმატში ინტენსიურმა განხილვამ.

ამასთან, გამოწვევად რჩება მუნიციპალიტეტებზე გაცემული რეკომენდაციების შესრულების მდგომარეობა, სადაც მხოლოდ 36%-ია შესრულებული, ნაწილობრივ შესრულებულია - 43%, მიმდინარეა - 6%, ხოლო შეუსრულებელია - 15%.

შესრულებული ნაწილობრივ შესრულებული მიმდინარე შეუსრულებელი ჯამურად 49% 30% 11% 10% ცენტრალური 61% 15% 19% 5% მუნიციპალიტეტები 36% 43% 6% 15% აჭარის ა.რ. 65% 24% 10% 0% აფხაზეთი ა.რ. 97% 2% 1% 0%

შესრულების ყველაზე მაღალი მაჩვენებელი აქვს ფინანსური აუდიტების ფარგლებში გაცემულ რეკომენდაციებს - 61%, ხოლო ყველაზე დაბალი ეფექტიანობის აუდიტის რეკომენდაციებს - 30%, რაც განპირობებულია ეფექტიანობის აუდიტების შინაარსიდან გამომდინარე რეკომენდაციების შესრულების მეტი სირთულითა და პროცესის ხანგრძლივობით.