4 თვეში სტალინის მუზეუმს 30 783 ვიზიტორი ეწვია - როგორია ტენდენცია?

2026 წლის პირველ ოთხ თვეში გორში მდებარე სტალინის სახელმწიფო მუზეუმს ჯამში 30,783 ვიზიტორი ეწვია, რაც 2025 წლის ანალოგიურ პერიოდთან შედარებით მცირე ზრდაა - გასულ წელს ამავე პერიოდში ვიზიტორთა რაოდენობა 30,531-ს შეადგენდა.

როგორც მუზეუმის მიერ BMG-სთვის მოწოდებული მონაცემებიდან ირკვევა, ვიზიტორთა უმრავლესობა კვლავ უცხოელია – 29,036 ადამიანი. იანვარ-აპრილში მუზეუმს 1,102 საქართველოს მოქალაქე ეწვია, ხოლო მოსწავლეების რაოდენობამ 645 შეადგინა.

წლიური მაჩვენებლის შემთხვევაში, მუზეუმის ინფორმაციით, გასულ წელს ჯამურად 171,192 ვიზიტორი დაფიქსირდა. მათივე თქმით, ვიზიტორებს შორის განსაკუთრებით მაღალი იყო ტურისტების წილი ისეთი ქვეყნებიდან, როგორიცაა ჩინეთი, რუსეთი და ირანი.

სტატისტიკა მიუთითებს, რომ მუზეუმში ვიზიტორთა ნაკადი სტაბილურია და მცირე, თუმცა პოზიტიურ ზრდას ინარჩუნებს, რაც ძირითადად უცხოელი ტურისტების მაღალი აქტივობით არის განპირობებული.

რაც შეეხება დაფინანსებას, მუზეუმში აცხადებენ, რომ მიმდინარე წელს კულტურის სამინისტროდან 65,000 ლარია გამოყოფილი. მათი განმარტებით, აღნიშნული თანხა კომუნალური ხარჯებისა და სამეურნეო ინვენტარის შეძენას ხმარდება.