500 ლარით დაწყებული ბიზნესი, რომელიც მცენარეებით სიმშვიდეს ქმნის - „ლილიეტო“ ახალი სივრცე „პაუზა“ გახსნა

ოთახის მცენარეების სტუდია „ლილიეტო“, რომელიც ერთი წლის წინ მხოლოდ 500 ლარიანი საწყისი ინვესტიციით შეიქმნა, ონლაინ სივრციდან ფიზიკურ სივრცეში გადავიდა.

ბრენდის დამფუძნებელმა მარი კევლიშვილმა BMGTV-ის გადაცემაში „ქალების ნარატივი“ განაცხადა, რომ მომხმარებლებს ახლა უკვე ახალ სივრცეს - „პაუზას“ სთავაზობს, სადაც მცენარეებთან ერთად ხელოვნება, კერამიკა, ვორქშოფები და სხვადასხვა შემოქმედებითი აქტივობაა გაერთიანებული.

მარი კევლიშვილის თქმით, „ლილიეტოს“ იდეა პირადი გამოცდილებიდან გაჩნდა - მას სურდა შეექმნა ისეთი გამოცდილება მცენარეების მოყვარულებისთვის, რომელიც თავადაც დააკლდა, როგორც მომხმარებელს.

„თავდაპირველად ჰობივით წამოვიწყე მცენარეების მოვლის საქმე, თუმცა მალევე მივხვდი, რომ ბაზარს ზუსტად ის აკლდა, რაც მეც დამაკლდა სხვა ანალოგიური ბრენდის მომხმარებელს. მინდოდა, რომ ჩემს მომხმარებელს უკვე ჰქონოდა გაუმჯობესებული გამოცდილება და მიეღო მცენარე, რომელიც იქნებოდა მოვლილი, კონკრეტულად მისთვის შერჩეულ ქოთანში გადარგული, შეფუთული და თუნდაც მისალოცი ბარათით“, - ამბობს „ლილიეტოს“ დამფუძნებელი.

როგორც მარი კევლიშვილი აღნიშნავს, ბიზნესის პირველი ნაბიჯები ოჯახურ ფორმატში გადაიდგა. მან შექმნა ბრენდის იდენტობა, ლოგო და სოციალური ქსელის გვერდი, შემდეგ კი პარტნიორთან ერთად 500 ლარის ფარგლებში შეიძინა პირველი მცენარეები და ქოთნები.

„წავედით სანერგეში და ვიყიდეთ 500 ლარის მცენარეები და ქოთნები, რომლებიც მოვიტანეთ, მოვუარეთ. პირველი კოლექცია განვათავსე და რამდენიმე დღეში არცერთი ქოთანი და არცერთი მცენარე აღარ გვქონდა. პირველივე შეკვეთაზე მივხვდი, რომ ეს იყო საქმე, რომელიც ადამიანებს გააბედნიერებდა და, რა თქმა უნდა, მეც დიდ ბედნიერებას და სიმშვიდეს მომიტანდა“, - იხსენებს მარი კევლიშვილი.

მისი თქმით, საწყის ეტაპზე თავად იყო ჩართული ყველა პროცესში - მცენარეების შერჩევიდან, გადარგვიდან და შეფუთვიდან დაწყებული, მომხმარებლებისთვის მიწოდებით დასრულებული. სწორედ ამ პროცესმა მისცა შესაძლებლობა, უკეთ გაეცნო მომხმარებლების საჭიროებები და ბრენდი მათ გამოცდილებაზე დაეფუძნებინა.