Accor საქართველოში გაფართოებას განაგრძობს – შავი ზღვის სანაპიროზე ახალი Swissôtel გაიხსნება

ახალი სასტუმროს გახსნა 2027 წლის დასაწყისში იგეგმება. Swissôtel ბათუმში შვეიცარიული სტუმარმასპინძლობის თანამედროვე სტანდარტებსა და ბრენდისთვის დამახასიათებელ გამოცდილებას დანერგავს.

სტუმარმასპინძლობის ინდუსტრიის ერთ-ერთმა წამყვანმა საერთაშორისო ჯგუფმა Accor-მა MC Construction LLC-სთან ფრენჩაიზის ხელშეკრულება გააფორმა. შეთანხმების ფარგლებში Swissôtel საქართველოს შავი ზღვის ერთ-ერთ მთავარ ტურისტულ ქალაქში ბათუმში გაიხსნება. სასტუმროს გახსნა 2027 წლის დასაწყისში იგეგმება. ახალი სასტუმროს გახსნით Accor საქართველოში საქმიანობას კიდევ უფრო გააფართოებს, ხოლო Swissôtel კავკასიის რეგიონში კიდევ ერთი სასტუმროთი იქნება წარმოდგენილი.

პროექტი კიდევ ერთხელ ადასტურებს, რომ საქართველო კავკასიის ერთ-ერთ ყველაზე მიმზიდველ ტურისტულ მიმართულებად ყალიბდება. ამ პროცესს ხელს უწყობს საერთაშორისო ვიზიტორების რაოდენობის ზრდა, განვითარებული საჰაერო მიმოსვლა და სტუმარმასპინძლობის ინფრასტრუქტურაში განხორციელებული ინვესტიციები. ხელსაყრელი ეკონომიკური გარემო, ტურისტული მოთხოვნის ზრდა და ინფრასტრუქტურის განვითარება საქართველოს საერთაშორისო ინვესტორებისა და სასტუმროების მმართველი კომპანიებისთვის სულ უფრო მიმზიდველ ბაზრად აქცევს. ბათუმი შავი ზღვის რეგიონში ერთ-ერთ წამყვან ტურისტულ და ბიზნესმიმართულებად ჩამოყალიბდა. ქალაქი სტუმრებს თანამედროვე არქიტექტურით, ზღვისპირა ბულვარით, მრავალფეროვანი გასტრონომიული გარემოთი და მთელი წლის განმავლობაში გამართული კულტურული, გასართობი და საერთაშორისო ბიზნესღონისძიებებით იზიდავს.

პროექტი MC Construction LLC-სთან თანამშრომლობით ხორციელდება. კომპანია საქართველოში პრემიუმ კლასის ერთ-ერთი წამყვანი დეველოპერია. პროექტი Accor-ისა და MC Construction LLC-ის გამოცდილებას აერთიანებს. MC Construction LLC საქართველოში მაღალი ხარისხის საცხოვრებელი და მრავალფუნქციური პროექტებით არის ცნობილი, რაც მას Swissôtel-ისთვის შესაფერის პარტნიორად აქცევს. სასტუმროს მართვას KMHC LLP განახორციელებს Accor-თან გაფორმებული ფრენჩაიზის ხელშეკრულების საფუძველზე.

Swissôtel Batumi რუსთაველის ქუჩის 30 ნომერში, ქალაქის ცენტრში განთავსდება. სასტუმროში იქნება 130 ნომერი, ტერასაზე განთავსებული ბარი და საცურაო აუზი ბათუმისა და შავი ზღვის სანაპიროს ხედებით, რესტორანი, ლობი-ბარი, სპა შიდა აუზით, თანამედროვე სპორტული დარბაზი და 1 500 კვადრატული მეტრის ფართობის საკონფერენციო სივრცეები. სასტუმრო ბათუმის სანაპიროს, ევროპის მოედნისა და „ალი და ნინოს“ ქანდაკების სიახლოვეს მდებარეობს. მისი ცენტრალური მდებარეობა სტუმრებს საშუალებას მისცემს, ფეხით მოინახულონ ქალაქის მთავარი ღირსშესანიშნაობები და ზღვისპირა სივრცეები.

Swissôtel Batumi-ის პროექტი საქართველოში Accor-ის მზარდ პორტფელს კიდევ ერთ სასტუმროს შემატებს. ამჟამად ქვეყანაში Accor-ის რვა ბრენდის 13 სასტუმრო ფუნქციონირებს.

Accor-ის პრემიუმ, საშუალო და ეკონომკლასის ბრენდების განვითარების ვიცე-პრეზიდენტმა დსთ-ის ქვეყნებში, საქართველოში, ისრაელსა და კვიპროსში ფილიპ ბონმა განაცხადა: „საქართველო რეგიონში ერთ-ერთ ყველაზე მიმზიდველ მიმართულებად ყალიბდება. ამას ხელს უწყობს საერთაშორისო ვიზიტორების რაოდენობის ზრდა, განვითარებული საჰაერო მიმოსვლა და სტუმარმასპინძლობის ინფრასტრუქტურაში მიმდინარე ინვესტიციები. Swissôtel-ის გახსნა ბათუმში, შავი ზღვის რეგიონის ერთ-ერთ ყველაზე სწრაფად განვითარებად ქალაქში, საქართველოს ბაზრის მიმართ ჩვენს ინტერესსა და მისი გრძელვადიანი განვითარების პოტენციალისადმი ნდობას ადასტურებს“.

Swissôtel 1980 წელს ციურიხში დაარსდა და მას შემდეგ შვეიცარიული სტუმარმასპინძლობის თანამედროვე ხედვას მსოფლიოს სხვადასხვა ქვეყანაში ავითარებს. ბრენდის იდენტობას სიზუსტე, ოსტატობა, ენერგია და ცხოვრებისადმი გააზრებული დამოკიდებულება განსაზღვრავს. თანამედროვე დიზაინი, ყურადღებიანი მომსახურება და შვეიცარიული ხარისხის ტრადიცია სტუმრებისთვის კომფორტულ და დასვენებაზე ორიენტირებულ გარემოს ქმნის.

Swissôtel უპირატესობას ხარისხს ანიჭებს და თითოეული დეტალი მისი დანიშნულებისა და გრძელვადიანი ღირებულების გათვალისწინებით არის გააზრებული. დღეს ბრენდი 20-ზე მეტ ქვეყანაში 50 სასტუმროს აერთიანებს და საერთაშორისო ქსელის გაფართოებას განაგრძობს. ახალი სასტუმროების გახსნით Swissôtel შვეიცარიული სტუმარმასპინძლობის საკუთარ ხედვას მსოფლიოს სულ უფრო მეტ ქვეყანაში წარადგენს.

Swissôtel-ის სასტუმროები ჩართულია ALL Accor-ის ლოიალობის პროგრამასა და დაჯავშნის პლატფორმაში, რომლის წევრებსაც მრავალფეროვან უპირატესობებზე, მომსახურებებსა და განსაკუთრებულ გამოცდილებებზე წვდომა აქვთ.

ACCOR-ის შესახებ

Accor სტუმარმასპინძლობის ინდუსტრიის ერთ-ერთი წამყვანი საერთაშორისო ჯგუფია, რომელიც მსოფლიოს 110-ზე მეტ ქვეყანაში საქმიანობს. მისი პორტფელი 5 800-ზე მეტ სასტუმროსა და კურორტს, 10 000 რესტორანსა და ბარს, ველნესსივრცეებსა და მოქნილ სამუშაო სივრცეებს აერთიანებს. ჯგუფს ინდუსტრიაში ერთ-ერთი ყველაზე მრავალფეროვანი ბრენდული პორტფელი აქვს და დაახლოებით 45 სასტუმრო ბრენდს მოიცავს, ლუქსიდან ეკონომკლასამდე, ასევე ცხოვრების სტილის მიმართულებას Ennismore-თან ერთად. ALL Accor ჯგუფის დაჯავშნის პლატფორმა და ლოიალობის პროგრამაა, რომელიც წევრებს როგორც სასტუმროში ყოფნისას, ისე მის ფარგლებს გარეთ, სხვადასხვა სერვისსა და განსაკუთრებულ გამოცდილებაზე წვდომას სთავაზობს. Accor-ის საქმიანობის მნიშვნელოვანი ნაწილი ეთიკურ ბიზნესპრინციპებს, პასუხისმგებლიან ტურიზმს, გარემოს მდგრადობას, ადგილობრივ თემებთან თანამშრომლობას, მრავალფეროვნებასა და ინკლუზიურობას უკავშირდება. ჯგუფის მისია პასუხისმგებლიანი სტუმარმასპინძლობის განვითარებას, კულტურების დაკავშირებასა და სტუმრებზე ზრუნვას ეფუძნება. Accor SA 1967 წელს დაარსდა და მისი სათავო ოფისი საფრანგეთში მდებარეობს. კომპანია CAC 40-ის ინდექსში შედის და მისი აქციები პარიზის Euronext-ის საფონდო ბირჟაზეა (ISIN: FR0000120404), ხოლო აშშ-ში OTC Market-ზე ACCYY-ის სიმბოლოთია წარმოდგენილი. დამატებითი ინფორმაცია ხელმისაწვდომია Accor-ის ოფიციალურ ვებგვერდზე, ასევე კომპანიის X, Facebook, LinkedIn, Instagram და TikTok გვერდებზე.