აჭარაში წლის ბოლომდე 5 000 ფერმერი აგროთანადაფინანსების ვაუჩერებსა და ტექნიკას მიიღებს
წლის ბოლომდე 5,000 ფერმერი აგროთანადაფინანსების ვაუჩერებსა და სხვადასხვა სახის სასოფლო-სამეურნეო ტექნიკასა და მოწყობილობებს მიიღებს. ამის შესახებ ღონისძიებაზე „სოფლისა და სოფლის მეურნეობის განვითარების ხელშეწყობა აჭარაში“ გახდა ცნობილი, რომელსაც გარემოს დაცვისა და სოფლის მეურნეობის მინისტრი დავით სონღულაშვილი, აჭარის მთავრობის თავმჯდომარე ზურაბ პატარაძე და აჭარის სოფლის მეურნეობის მინისტრი დენის სალუქვაძე დაესწრნენ.
ღონისძიებაზე სიტყვით გამოსვლისას დავით სონღულაშვილმა განაცხადა, რომ აჭარის რეგიონს სოფლის მეურნეობის განვითარების მნიშვნელოვანი პოტენციალი აქვს, რომლის სრულად ათვისებისთვის აუცილებელია თანამედროვე ტექნოლოგიების დანერგვა, ცოდნის გაღრმავება და ფინანსურ რესურსებზე ხელმისაწვდომობის გაზრდა.
„აჭარის რეგიონი თავისი უნიკალური კლიმატური პირობებითა და ბუნებრივი რესურსებით მნიშვნელოვან პოტენციალს ფლობს მეხილეობის, მეფუტკრეობისა და მეციტრუსეობის განვითარების მიმართულებით. ამ პოტენციალის სრულად ათვისებისთვის, აუცილებელია თანამედროვე ტექნოლოგიების დანერგვა, ცოდნის გაღრმავება და ფინანსურ რესურსებზე ხელმისაწვდომობის გაზრდა. სახელმწიფოს მხარდამჭერი პროგრამები სწორედ ამ მიზანს ემსახურება და ფერმერებს შესაძლებლობას აძლევს, განაახლონ საწარმოო საშუალებები, გაზარდონ წარმოების ხარისხი და პროდუქტიულობა. საოჯახო მეურნეობების განვითარება ცენტრალური ხელისუფლების ერთ-ერთი პრიორიტეტული მიმართულებაა. აჭარის მთავრობის მიერ განხორციელებული პროგრამა ამ მიმართულებით წარმატებული მაგალითია. წლის ბოლომდე 5 000 ბენეფიციარის მხარდაჭერა ნიშნავს 5 000 ახალ შესაძლებლობას ფერმერებისთვის, რაც მნიშვნელოვანი წვლილია როგორც რეგიონის, ისე ქვეყნის ეკონომიკური განვითარების საქმეში“, - განაცხადა დავით სონღულაშვილმა.
ღონისძიების დასასრულს, საოჯახო მეურნეობების განვითარების პროგრამის ბენეფიციარებს აგროთანადაფინანსების ვაუჩერები საზეიმოდ გადაეცათ. პროგრამის მიზანი საოჯახო მეურნეობებისა და სასოფლო-სამეურნეო გაერთიანებების გაძლიერება, ფინანსურ რესურსებზე ხელმისაწვდომობის ზრდა და აგროსასურსათო სექტორის კონკურენტუნარიანობის ამაღლებაა. მიმდინარე 2026 წლის განმავლობაში, ამ ინიციატივის ფარგლებში, დაახლოებით 5 000 ფერმერი თანადაფინანსებით მიიღებს სხვადასხვა სახის სასოფლო-სამეურნეო ტექნიკასა და მოწყობილობებს.