აფხაზეთის ავტონომიური რესპუბლიკის ლეგიტიმური მთავრობა "ბიზნეს ინკუბატორის" პროექტს ხურავს

აფხაზეთის ავტონომიური რესპუბლიკის ლეგიტიმური მთავრობა "ბიზნეს ინკუბატორის" პროექტს ხურავს - ამის შესახებ საკანონმდებლო მაცნეზე გამოქვეყნებულ დადგენილებაშია აღნიშნული. პროექტი 2021 წლიდან არსებობდა და ის დევნილი მოსახლეობის მეწარმეობის წახალისებას ისახავდა მიზნად.

პროექტი ასევე მოიცავდა იძულებით გადაადგილებულ პირთა დასაქმების, სტაჟირების და კვალიფიკაციის ამაღლების ხელშეწყობას და საერთაშორისო განვითარების სააგენტოებთან პარტნიორობას. ავტონომიური რესპუბლიკის მთავრობის ანგარიშის თანახმად, ამ სააგენტოში შვიდი ადამიანი იყო დასაქმებული.

ბიზნეს ინკუბატორის 2025 წლის საქმიანობის შესახებ ინფორმაცია ხელმისაწვდომი არაა, თუმცა 2024 წლის მდგომარეობით სააგენტოს 14 მეწარმესთან ჰქონდა შეთანხმებები გაფორმებული, ამასთან 2024 წლის I კვარტალში, USAID-ის პროექტის ფარგლებში, დაფინანსდა 4 ერთობლივი (4 ქართველი და 4 აფხაზი) ქართულ-აფხაზური ბიზნეს პროექტი ჯამური თანხით 10 472 ლარი. კერძოდ:

• იდეალის ჯიშის ნიგვზის ნერგები — 3,600 ლარი • მოტობლოკის შეძენა სანერგე მეურნეობის გაფართოებისთვის — 2,300 ლარი • რკინის ნაკეთობების წარმოებისთვის ხელსაწყოების შეძენა — 3,070 ლარი • ქალის ტანსაცმლის ბიზნესი — 1,502 ლარი

"ბიზნეს ინკუბატორში 2018-2022წ.წ. ხორციელდებოდა სსიპ შოთა რუსთაველის ეროვნული სამეცნიერო ფონდის მიერ დაფინანსებული 4-წლიანი საგრანტო პროექტი, რომლის მიზანს წარმოადგენდა ავტომატური მართვის მექანიზმით აღჭურვილი, ენერგოდამზოგი და უსაფრთხო, მასობრივი მოხმარების ქარძრავის წარმოება. საანგარიშო პერიოდში ბიზნეს ინკუბატორსა და შოთა რუსთაველის სამეცნიერო ფონდს შორის გაფორმებული №AR-18-2653 საგრანტო პროექტის ფარგლებში, ასევე ბიზნეს ინკუბატორის მიმართვის საფუძველზე, რუსთაველის ფონდის მიერ, ხელშეკრულების გეგმა-გრაფიკით გათვალისწინებული ვალდებულებების შესასრულებლად, კერძოდ საწარმოო ხაზის მოსაწყობად, განსაზღვრულ დამატებით ვადაში (2024 წლის 3 აპრილი), შეძენილ იქნა კომპიუტერული ტექნიკა - სამგანზომილებიანი 3 D პრინტერი", - ნათქვამია ბიზნეს ინკუბატორის უკანასკნელ საჯაროდ გამოქვეყნებულ საქმიანობის ანგარიშში.