აგვისტოში ინფლაციური მოლოდინები შემცირდა - ეროვნული ბანკი

საქართველოს ეროვნული ბანკის მიერ გამოქვეყნებული კვლევის თანახმად, 2026 წლის აგვისტოში ეკონომიკური საქმიანობის მონაწილეთა ინფლაციური მოლოდინები შემცირდა როგორც ერთწლიან, ისე სამწლიან პერიოდზე. ამასთან, გამოკითხულთა მოლოდინების მიხედვით, საკუთარ პროდუქციასა და მომსახურებაზე ფასების ზრდის მოლოდინი თითქმის უცვლელი დარჩა, ხოლო ხელფასების ზრდასთან დაკავშირებული მოლოდინები შემცირდა.

ეკონომიკური საქმიანობის მონაწილეთა გამოკითხვის მიხედვით, ივლისთან შედარებით აგვისტოში ერთწლიან პერიოდში ფასების 6%-8%-იანი ზრდის მოლოდინის მქონე რესპონდენტთა წილი მნიშვნელოვნად შემცირდა. ამავდროულად, გაიზარდა იმ მონაწილეთა რაოდენობა, რომლებიც მომდევნო ერთი წლის განმავლობაში ფასების 2%-4%-ით ან 8%-ზე მეტად ზრდას ელოდებიან.

სამწლიან პერიოდში ინფლაციური მოლოდინებიც შემცირდა. კერძოდ, შემცირდა იმ რესპონდენტთა რაოდენობა, რომლებიც მომდევნო სამი წლის განმავლობაში ფასების 4%-6%-ით ან 8%-ზე მეტად ზრდას ვარაუდობენ. ამასთან, გაიზარდა იმ მონაწილეთა რაოდენობა, რომლებიც ფასების 2%-4%-იან და 6%-8%-იან ზრდას ელოდებიან.

გამოკითხვის თანახმად, საკუთარ პროდუქციასა და მომსახურებაზე ფასების ზრდის მოლოდინი ერთწლიან პერიოდში თითქმის უცვლელი დარჩა. გაიზარდა იმ რესპონდენტთა რაოდენობა, რომლებიც ფასების 2%-4%-ით ან 8%-ზე მეტად მატებას ელოდებიან, თუმცა შემცირდა იმ მონაწილეთა რაოდენობა, რომლებიც 0%-2%, 4%-6% და 6%-8%-იან ზრდას პროგნოზირებენ.

აგვისტოში, ივლისთან შედარებით, შემცირდა ხელფასების ზრდის მოლოდინიც. კერძოდ, ნაკლებია იმ რესპონდენტთა რაოდენობა, რომლებიც ხელფასების 20%-30%-ით ან 30%-ზე მეტად ზრდას ელოდებიან. ამავდროულად, გაიზარდა იმ მონაწილეთა რაოდენობა, რომლებიც ხელფასების უცვლელად შენარჩუნებას ვარაუდობენ.

გამოკითხულთა შეფასებით, აგვისტოში წინა თვესთან შედარებით შემცირდა კომპანიებში წარმოებისთვის საჭირო რესურსების გამოყენების ეფექტიანობაც, რაც გულისხმობს რესურსების რეალური გამოყენების შეფარდებას მათ მაქსიმალურ გამოყენებასთან.