AI-ის გამო, Intuit-მა 3 000 თანამშრომლის გათავისუფლება გადაწყვიტა

ბიზნესპროგრამული უზრუნველყოფის გიგანტმა, Intuit-მა კორპორაციული სტრუქტურის გამარტივებისა და რესურსების AI-ის მიმართულებით გადამისამართების მიზნით, სამუშაო ძალის 17%-იანი შემცირება დააანონსა.

Reuters-ის ინფორმაციით, სამსახურიდან დაახლოებით 3,000 ადამიანის გაშვება იგეგმება. კომპანიის გენერალურმა დირექტორმა, სასან გუდარზიმ თანამშრომლებისთვის გაგზავნილ შიდა წერილში განმარტა, რომ რეორგანიზაცია ბიუროკრატიული სირთულეების შემცირებასა და ახალი ტექნოლოგიური პროდუქტების განვითარებას ისახავს მიზნად.

მნიშვნელოვანია ითქვას, რომ მიმდინარე ფისკალური წლის მეორე კვარტალში, რომელიც იანვარში დასრულდა, Intuit-ის შემოსავალი 17%-ით გაიზარდა და $4.65 მილიარდი შეადგინა, წმინდა მოგება კი 48%-ით გაუმჯობესდა და $693 მილიონს გაუტოლდა. რაც შეეხება მომავალი კვარტალის პროგნოზს, მენეჯმენტი შემოსავლების კიდევ 10%-იან ზრდას ელოდება.

შეგახსენებთ, რომ Intuit-ი საბუღალტრო, საგადასახადო და პერსონალური ფინანსების მართვის ისეთ პოპულარულ პროგრამებს აერთიანებს, როგორებიცაა: TurboTax, QuickBooks და Credit Karma. ბოლო წლიური ანგარიშის მიხედვით, კომპანია მსოფლიო მასშტაბით 18,200 თანამშრომელს ასაქმებდა.