AI-მ მიაგნო ხარვეზს, რომელიც ვებსაიტების 70%-ისთვის საფრთხის შემცველია

კიბერუსაფრთხოების სფეროში მომუშავე სპეციალისტებმა ხელოვნური ინტელექტის დახმარებით მსოფლიო ქსელის ერთ-ერთი ყველაზე მასშტაბური საფრთხე აღმოაჩინეს. პროგრამირების ენის შემქმნელებმა კრიტიკული პრობლემის, PHP2Shell-ის შესახებ ინფორმაცია ოთხშაბათს გაასაჯაროვეს.

როგორც ირკვევა, ჰაკერებს ამ ხარვეზის გამოყენებით შეუძლიათ კონტროლის მოპოვება ნებისმიერ იმ სისტემაზე, სადაც PHP ტექნოლოგია მუშაობს. ექსპერტების შეფასებით, ეს სისუსტე მსოფლიოს ვებსაიტების 70%-ს პირდაპირ საფრთხეს უქმნის. აღსანიშნავია, რომ ამჟამად ვებადმინისტრატორები სისტემების დაცვას სასწრაფო რეჟიმში ცდილობენ.

არსებული ინფორმაციით, უსაფრთხოების სისტემის სისუსტე კომპანია Calif-ის მკვლევარმა რაიან ოსტინმა აგვისტოში გამოავლინა. ამ პროცესში სპეციალისტმა OpenAI-ის უახლესი მოდელი GPT-5.6 Sol-ი გამოიყენა.

აღსანიშნავია, რომ საფრთხის პრევენციის მიზნით ზოგიერთმა სამთავრობო და კომერციულმა ორგანიზაციამ საკუთარი ვებსაიტები წინასწარ უკვე გათიშა. PHP-ის პროექტის მმართველი ფონდის უსაფრთხოების ინჟინრის, ვოლკერ დუშის განცხადებით, ეს გასული ათწლეულის ყველაზე მწვავე პრობლემაა.

სპეციალისტები შიშობენ, რომ დამნაშავეები ხელოვნური ინტელექტის ინსტრუმენტებს ამ ხარვეზის სწრაფად საპოვნელად და სისტემაში შესაღწევად გამოიყენებენ.

ცნობისთვის, მეხსიერების მართვასთან დაკავშირებული ეს ხარვეზი PHP-ის კოდში წლების განმავლობაში არსებობდა. უსაფრთხოების მკვლევრებმა ეს პრობლემა ათწლეულების წინ შენიშნეს, თუმცა ამ ხარვეზის გამოყენება ზედმეტად რთულად მიიჩნეოდა.