"ახალმა თაობამ კითხვის კულტურა სხვა საფეხურზე აიყვანა" - რას სთავაზობს uBooks მკითხველებს?

საქართველოს წიგნის ბაზარზე ახალი პლატფორმა Urban Books (uBooks) გამოჩნდა, რომელიც მკითხველს ორიგინალ ენაზე გამოცემული, ლიცენზირებული ლიტერატურის შეძენას სთავაზობს. პროექტი გამომცემლობა "მოუბარის" დამფუძნებლებმა - გუჯა ქემოკლიძემ, დათა ხარაიშვილმა და ანრი მაღლაკელიძემ განახორციელეს. ახალი პლატფორმის შექმნის მიზნებზე, ბაზარზე არსებულ გამოწვევებზე, ფასწარმოქმნასა და სამომავლო გეგმებზე bm.ge-სთან პროექტის ავტორებმა ისაუბრეს.

გამომცემლობა "მოუბარი" ბაზარზე ძირითადად ფანტასტიკისა და ფენტეზის ჟანრის მსოფლიო ბესტსელერების ქართული თარგმანებით არის წარმოდგენილი. uBooks კი ამ ეკოსისტემის ლოგიკურ გაგრძელებად ჩამოყალიბდა, რომელიც მკითხველის ალტერნატიულ მოთხოვნას პასუხობს.

როგორც კომპანიის ფინანსური და საოპერაციო მენეჯერი, გუჯა ქემოკლიძე განმარტავს, პროექტზე მუშაობის პროცესში ნათლად გამოიკვეთა იმ აუდიტორიის საჭიროებები, რომელსაც წიგნების ორიგინალ ენაზე კითხვა ურჩევნია.

"მოუბარი სრულფასოვანი საგამომცემლო კომპანიაა, რომელიც წიგნის გამოცემის ყველა ეტაპს ფარავს. ჩვენ ვმუშაობთ უშუალოდ უცხოელ საავტორო უფლებების მფლობელებთან და სააგენტოებთან, ვყიდულობთ ოფიციალურ ლიცენზიებს და მკაცრი კორპორაციული სტანდარტებით ვამზადებთ მათ ქართულ თარგმანებს. uBooks ამ დიდი ეკოსისტემის ლოგიკური, თუმცა დამოუკიდებელი გაგრძელებაა. მკითხველს აქვს სრული თავისუფლება: ვისაც პროფესიონალური ქართული თარგმანი სურს, "მოუბარი" მის განკარგულებაშია; ვისაც ორიგინალის წაკითხვა უნდა, შედის uBooks-ზე და იწერს ლიცენზირებულ ინგლისურენოვან ვერსიას",- ამბობს ის.

ახალი პლატფორმის შექმნის ერთ-ერთი მთავარი წინაპირობა ქართულ ბაზარზე არსებული მეკობრული (პირატული) წიგნების პრობლემა გახდა. uBooks-ის ტექნოლოგიური ხელმძღვანელი, ანრი მაღლაკელიძე აღნიშნავს, რომ პროექტის მიზანი ბაზარზე ხარისხიანი და ლეგალური ალტერნატივის შეთავაზება იყო.

"მთავარი მოტივაცია იყო ის, რომ საქართველოში უშუალოდ წიგნის ინდუსტრიის სპეციფიკაზე მორგებული, მასშტაბური ტექნოლოგიური პროდუქტი აქამდე არ გვქონდა. მეორე, ძალიან პრინციპული მიზეზი ბაზარზე არსებული ქაოსია. ყველგან იყიდება სარდაფებში დაბეჭდილი მეკობრული ასლები. ირანიდან თუ სხვა ქვეყნებიდან შემოტანილმა ე.წ. პირატულმა წიგნებმა სერიოზული პრობლემა შექმნა. ჩვენი პოზიცია აქ სრულიად ურყევია: შპს "წიგნების ბანკი" (იგივე გამომცემლობა მოუბარი), როგორც საქართველოს წიგნის ასოციაციის წევრი, მკაცრად გმობს საქართველოს ბაზარზე შემოსული პირატული, დაბალხარისხიანი ასლების რეალიზაციას. ინტელექტუალური საკუთრების დაცვა ჩვენი უცვლელი პოლიტიკაა. uBooks-ზე განთავსებული თითოეული წიგნი ყოველთვის იყო და არის მხოლოდ კანონის სრული დაცვით დაბეჭდილი ორიგინალი გამოცემა", - აღნიშნავს ანრი მაღლაკელიძე.