ახლო აღმოსავლეთის კონფლიქტმა დაზღვევის ფასებზე განსაკუთრებული გავლენა მოახდინა - ნინა კობახიძე

„გლობალ ბენეფიტს ჯორჯიას“ სამეთვალყურეო საბჭოს თავმჯდომარის განცხადებით, ახლო აღმოსავლეთში მიმდინარე ომმა სადაზღვევო სექტორზე მნიშვნელოვანი გავლენა მოახდინა. ნინა კობახიძე bm.ge-სთან ინტერვიუში ამბობს, რომ სადაზღვევო პროდუქტების ფასზე რამდენიმე ფაქტორი მოქმედებს, რისი გავლენითაც მოლოდინია, რომ წელს დაზღვევის სხვადასხვა სახეობის პოლისზე ფასი 15%-მდე შეიძლება გაიზარდოს.

“განსაკუთრებული გავლენა მოახდინა ფასთა პოლიტიკაზე ახლო აღმოსავლეთის ომმა. იცით, რომ სადაზღვევო სექტორი ძალიან აქტიურად ჩაერთო, განსაკუთრებით ტვირთების დაზღვევის მიმართულებით და ბუნებრივია, ველოდებით, რომ გადაზღვევის ფასებმა შეიძლება ცვლილება განიცადოს.

პირდაპირპროპორციულია საწვავის, თუ ელექტროენერგიის გაძვირება სადაზღვევო პროდუქტების გაძვირებასთან, გამომდინარე იქიდან, რომ ჩვენი მომსახურება ავტომატურად სამედიცინო სექტორს იყენებს, ხოლო ავტოტრანსპორტის თვალსაზრისით — იგივე იმპორტით შემოსული ავტონაწილების [ღირებულება] მომსახურების ფასებზე ახდენს ზეგავლენას. ანუ, ფასები გაიზრდება წელს.

ბაზრის ზრდაზე რომ ვსაუბრობთ, აქ ერთ-ერთი კომპონენტი არის ფასების ზრდაც და ინფლაციაც. მომხმარებელი შეიძლება არ დახვდეს მზად ფასების ზრდას და საერთოდ უარი განაცხადოს დაზღვევაზე, ამიტომ ჩვენ ძალიან ფრთხილი ვართ ფასების მატებასთან მიმართებით და ყოველთვის ვითვალისწინებთ მომხმარებლის ინტერესს.

ზუსტად ვერ გეტყვით [რამდენით შეიძლება გაძვირდეს დაზღვევა], გამომდინარე იქიდან, რომ ჩვენ, მაგალითად, კორპორატიულ სექტორზე ვმუშაობთ და ინდივიდუალურად გამოვდივართ ორგანიზაციებიდან, თუმცა სადღაც 7, 8, 10, 15 პროცენტამდეც კი შეიძლება ავიდეს [ფასის ზრდა] სხვადასხვა სახეობების მიმართულებით”,-აცხადებს ნინა კობახიძე.