Amazon-ის შემოსავალმა II კვარტალში $200.6 მილიარდს მიაღწია

ამერიკულმა ტექნოლოგიურმა გიგანტმა Amazon-მა 2026 წლის მეორე კვარტალში $200.6 მილიარდის შემოსავალი მიიღო, რაც გასული წლის ანალოგიურ პერიოდთან შედარებით 20%-ით მეტია. კომპანიის წმინდა მოგებამ $62.6 მილიარდი შეადგინა, ხოლო თითო აქციაზე მოგება $5.75-მდე გაიზარდა.

აღსანიშნავია, რომ თუ გასული წლის ანალოგიურ პერიოდში Amazon-ის წმინდა მოგება $18.2 მილიარდს, ხოლო თითო აქციაზე მოგება $1.68-ს შეადგენდა, ამჯერად ფინანსურ ზრდაზე მნიშვნელოვანი გავლენა Anthropic-ში განხორციელებულმა ინვესტიციებმა იქონია. ამ მიმართულებით მიღებულმა არასაოპერაციო შემოსავალმა $53.4 მილიარდს მიაღწია.

ამასთან, კომპანიის საოპერაციო მოგება 43%-ით გაიზარდა და $27.5 მილიარდი შეადგინა. სეგმენტების მიხედვით, ყველაზე სწრაფი ზრდა ღრუბლოვანმა სეგმენტმა AWS-მა დააფიქსირა. ამ მიმართულების შემოსავალი 37%-ით გაიზარდა და $42.2 მილიარდს მიაღწია. ჩრდილოეთ ამერიკის რეგიონში გაყიდვები 16%-ით გაიზარდა და $116.2 მილიარდი შეადგინა, ხოლო საერთაშორისო სეგმენტში შემოსავალმა 15%-იანი ზრდით $42.2 მილიარდს მიაღწია. პარალელურად, სარეკლამო მიმართულების შემოსავალი 26%-ით გაიზარდა, ხოლო ხელოვნური ინტელექტისა და ჩიპების წარმოების წლიურმა შემოსავალმა $25 მილიარდს გადააჭარბა.

მნიშვნელოვანია ითქვას, რომ მესამე კვარტალში Amazon-ი შემოსავლების $197.0 მილიარდიდან $202.0 მილიარდამდე გაზრდას ელოდება. საოპერაციო მოგების პროგნოზი კი $22.5 მილიარდიდან $26.5 მილიარდამდე შუალედში განისაზღვრა. საყურადღებოა, რომ Meta-სა და სხვა ტექ-გიგანტების მსგავსად ჯეფ ბეზოსის კომპანიის თავისუფალი ფულადი ნაკადებიც მკვეთრად, $7.6 მილიარდით შემცირდა, რაც ხელოვნური ინტელექტის ინფრასტრუქტურასა და აღჭურვილობაში განხორციელებულმა $66.1-მილიარდიანმა ინვესტიციებმა გამოიწვია.

ცნობისთვის, Amazon-ი 1994 წელს დაარსებული ამერიკული ტექნოლოგიური გიგანტია, რომელიც ელექტრონული კომერციის, ღრუბლოვანი ტექნოლოგიებისა და ხელოვნური ინტელექტის სექტორში ოპერირებს. კომპანიის სათავო ოფისი ვაშინგტონის შტატის ქალაქ სიეტლში მდებარეობს.