Anthropic-მა საფონდო ბირჟაზე $2-ტრილიონიანი IPO-ს განაცხადი წარადგინა

ხელოვნურ ინტელექტის განვითარებაზე მომუშავე ამერიკულმა კომპანია Anthropic-მა აშშ-ის ფასიანი ქაღალდებისა და ბირჟების კომისიას საჯარო შეთავაზების განაცხადი ოფიციალურად წარუდგინა.

დოკუმენტაციის თანახმად, Anthropic-ის აქციები Nasdaq-ის საფონდო ბირჟაზე ნოემბერში ANT-ის სიმბოლოთი განთავსდება. საჯარო შეთავაზების მთავარი მხარდამჭერები საინვესტიციო ბანკები, Goldman Sachs და Morgan Stanley იქნებიან.

როგორც ირკვევა, თუ გასული წლის ანალოგიურ პერიოდში კომპანიამ 1.2 მილიარდი დოლარის შემოსავალი მიიღო, ამჯერად 2026 წლის პირველ ნახევარში მაჩვენებელმა 16.3 მილიარდი დოლარი შეადგინა. ამასთან, ანგარიშგების მიხედვით, Anthropic-ის ექვსი თვის წმინდა ზარალი 12.9 მილიარდიდან 80.7 მილიარდ დოლარამდე გაიზარდა, თუმცა, როგორც ჩანს, ინვესტორებს ეს არ აღელვებთ.ამჟამინდელი მოცემულობით, Claude-ის დეველოპერი კომპანიის საბაზრო ღირებულება დაახლოებით $2 ტრილიონს შეადგენს, შესაბამისად, მისი IPO-ს მოცულობა ისტორიაში ყველაზე მაღალი იქნება და წელს SpaceX-ის მიერ დაფიქსირებულ რეკორდს მოხსნის.

შეგახსენებთ, კომპანია Anthropic-ი 2021 წელს Google-ისა და OpenAI-ის ყოფილმა თანამშრომლებმა, დარიო და დანიელა ამოდეებმა დააფუძნეს. მოცემული შედეგების გათვალისწინებით, Anthropic-ს ისტორიაში ყველაზე სწრაფად მზარდი სტარტაპის რეკორდიც ეკუთვნის.