შავი ზღვა კომერციული გემებისთვის მსოფლიოში ყველაზე მომაკვდინებელ მარშრუტად იქცა - Financial Times

გავლენიანი გამოცემა Financial Times-ის ინფორმაციით, შავ ზღვაში კომერციული გემების ეკიპაჟის წევრთა დაღუპვის მაჩვენებელმა სპარსეთის ყურისა და ჰორმუზის სრუტის მონაცემებს გადააჭარბა.

როგორც მედია წერს, საზღვაო უსაფრთხოების კომპანია Ambrey-სა და საერთაშორისო საზღვაო ორგანიზაციის მონაცემებით, მიმდინარე წელს თავდასხმა 570-ზე მეტ ხომალდზე დაფიქსირდა. ყველა ამ ინციდენტს კი რეგიონში, სულ მცირე, 40 მეზღვაური ემსხვერპლა.

შედარებისთვის, ჰორმუზის სრუტეში დაღუპულთა დადასტურებულმა რაოდენობამ მხოლოდ 24 შეადგინა. დარგის ექსპერტების შეფასებით, შავ ზღვაში იერიშების საერთო სიხშირემ ახლო აღმოსავლეთის მაჩვენებელს 6-ჯერ უკვე გადააჭარბა.

მნიშვნელოვანია ითქვას, რომ ვითარება განსაკუთრებით მიმდინარე წლის მესამე ნახევარში დაიძაბა. ივლისიდან სექტემბრამდე პერიოდში დარტყმა 387 ხომალდზე დაფიქსირდა. აღსანიშნავია, რომ ეს მონაცემი წინა პერიოდთან შედარებით 5-ჯერ არის გაზრდილი.

საყურადღებოა, რომ ბოლო 45 დღის განმავლობაში სავაჭრო გემებზე განხორციელებული იერიშების თითქმის 90% რუსეთის ფედერაციაზე მოდიოდა. უსაფრთხოების სპეციალისტების შეფასებით, კრემლმა სამხედრო ტაქტიკა არსებითად შეცვალა. თუ ადრე მათი დარტყმები მიზნად ძრავების მწყობრიდან გამოყვანას ისახავდა, ამჯერად რუსეთი უშუალოდ სანავიგაციო ხიდურებსა და ეკიპაჟის საცხოვრებელ სივრცეებს ბომბავს.

რაც შეეხება ეკონომიკურ და ლოგისტიკურ შედეგებს, შექმნილმა კრიზისმა საზღვაო გადაზიდვების ტარიფები მკვეთრად გაზარდა. მზღვეველების შეფასებით, სამხედრო რისკის დაზღვევის ფასმა გემის ღირებულების 15%-ს მიაღწია, ეს მაჩვენებელი კი სპარსეთის ყურის მონაცემზე თითქმის 2-ჯერ მეტს ნიშნავს.

მკვეთრად გაზრდილი ხარჯების გამო, გადამზიდავებმა რეგიონში 50 წლამდე დაძველებული გემების გაგზავნა დაიწყეს. ამ ხომალდებზე კი ძირითადად მუშაობენ სირიელი, ეგვიპტელი და აზერბაიჯანელი მეზღვაურები, რომელთა საბაზისო ანაზღაურება თვეში ხშირად მხოლოდ $800-ს შეადგენს.