Apple-მა OpenAI-ს სასამართლოში უჩივლა - რას ედავება ტექ-გიგანტი სტარტაპს?

ამერიკულმა ტექნოლოგიურმა გიგანტმა Apple-მა კალიფორნიის შტატის ჩრდილოეთ ოლქის ფედერალურ სასამართლოში ინტელექტუალური საკუთრების მითვისების ბრალდებით OpenAI-ს უჩივლა.

სასამართლოსთვის წარდგენილი დოკუმენტების მიხედვით, OpenAI-ი Apple-ის კომერციულ საიდუმლოებებს, ორგანიზებულად, ყველა დონეზე იპარავდა. Apple-ის უფლებადამცველის განცხადებით, მათ ხელთ აქვთ OpenAI-ის თანამშრომლების მიერ კომპანიის ერთ-ერთი გაუსაჯაროებელი პროდუქტის კონფიდენციალური მონაცემების მართლსაწინააღმდეგო მითვისების დამადასტურებელი მნიშვნელოვანი მტკიცებულება.

აღსანიშნავია, რომ საქმეში ერთ-ერთი მთავარი ბრალდებული Apple-ის ყოფილი ვიცე-პრეზიდენტი და OpenAI-ის აპარატურის მიმართულების ხელმძღვანელი ტანტ ტანია. სარჩელის თანახმად, ის Apple-ის თანამშრომლებს გასაუბრებებზე საჩვენებელი სესიებისთვის კომპანიის რეალური, კონფიდენციალური მასალების მიტანას სთხოვდა. ამასთან, სასამართლო დოკუმენტებში ფიგურირებს Apple-ის კიდევ ერთი ყოფილი თანამშრომელი ჩანგ ლიუ, რომელმაც კომპანიიდან წასვლისას პორტატული კომპიუტერი მოიპარა.

Apple-ის მტკიცებით, OpenAI პარტნიორ კომპანიებს ლითონის დამუშავების Apple-ის მიერ გამოგონებული ტექნოლოგიის გამოყენებას ავალებდა და მათ ატყუებდა, თითქოს ამაზე ნებართვა თავად ტექ-გიგანტისაგან ჰქონდა.

რაც შეეხება OpenAI-ის პოზიციას, ლაბორატორიის წარმომადგენელმა კომერციული საიდუმლოებების მოპარვასთან დაკავშირებით Apple-ის ბრალდებები კატეგორიულად უარყო. მისი თქმით, სტარტაპი საკუთარ პოზიციას ბოლომდე დაიცავს.

ცნობისთვის, ამ ორ კომპანიას შორის 2024 წელს პარტნიორობის შეთანხმებაც კი გაფორმდა. მაშინ ტიმ კუკის ფირმა iPhone-ის ოპერაციულ სისტემაში ChatGPT-ის პირდაპირ ინტეგრაციას გეგმავდა, თუმცა 2025 წლის მიწურულს, არადამაკმაყოფილებელი ტექნოლოგიური განვითარების გამო Apple-მა არჩევანი კონკურენტ Gemini-ზე შეაჩერა.