„აპრილში, თბილისში უძრავი ქონების ტრანზაქციები 12.7%-ით, წლის 4 თვეში კი 15%-ით გაიზარდა“ - Colliers Georgia

2026 წლის აპრილში, თბილისში ძველი ბინების საშუალო შეწონილი გასაყიდი ფასი 2025 წლის აპრილთან შედარებით გაიზარდა. კერძოდ, ქალაქის ცენტრში 11%-ით, ფართო ცენტრში 10%-ით, ხოლო გარეუბანში 6.2%-ით არის გაზრდილი. ამასთან, ქალაქის მასშტაბით ძველ პროექტებში ფასმა 10.6%-ით მოიმატა.

Recov.ge-ზე გამოქვეყნებული განახლებული მონაცემების მიხედვით, 2026 წლის აპრილში, თბილისში საცხოვრებელი ბინების ტრანზაქციების რაოდენობა გასული წლის აპრილთან შედარებით 12.7%-ით გაიზარდა. ბაზრის ზომამ კი 28.3%-ით, 310 მილიონ აშშ დოლარამდე მოიმატა.

უფრო დეტალურად, Colliers Georgia-ს აპრილის განახლების მიხედვით, აპრილში დედაქალაქში 3 603 ტრანზაქცია დარეგისტრირდა, მაშინ როცა 2025-ში ეს რიცხვი 3 197, 2024-ში კი 3 282 იყო.

ახალაშენებული ბინების საშუალო შეწონილ გასაყიდ ფასს თუ შევხედავთ, გასულ თვეში 2025 წლის აპრილთან შედარებით 10.2%-ით გაიზარდა გარეუბნებში, 2.2%-ით - ფართო ცენტრში, ხოლო ქალაქის ცენტრში 12.1%-იანი ზრდა დაფიქსირდა.

ქალაქის მასშტაბით პირველადი ტრანზაქციების საშუალო შეწონილი ფასის ზრდამ 11.2% შეადგინა. მეორეულ ბაზარზე კი საშუალო შეწონილი ფასი ქალაქის მასშტაბით 11%-ით გაიზარდა.

2026 წლის აპრილში თბილისში ახალ პროექტებში ტრანზაქციების რაოდენობა გასული წლის აპრილთან შედარებით 14.6%-ით გაიზარდა. ზრდა დაფიქსირდა ახალაშენებული ბინების, როგორც პირველად (10.7%), ისე მეორეულ ბაზრებზე (20.4%). ტრანზაქციების რაოდენობა 6.2%-ით გაიზარდა ძველ პროექტებშიც.

როგორც Colliers Georgia-ს კვლევებისა და მონაცემთა სერვისების ხელმძღვანელმა ლეო ჩიქავამ „საქმიანი დილის“ ეთერში განაცხადა, თბილისში, როგორც ძველ ისე ახალ პროექტებში ტრანზაქციების უმეტესობა საქართველოს მოქალაქეებზე მოდის, უცხოეთის მოქალაქეების წილი კი 2026 წლის აპრილში, მხოლოდ, 10.7% იყო.