[აქციებზე] დაკავებულების გათავისუფლებაზე კვლავ ვისაუბრებთ ხელისუფლებასთან - მამა ანდრია ჯაღმაიძე

საპატრიარქოს საზოგადოებასთან ურთიერთობის სამსახურის ხელმძღვანელის, მამა ანდრია ჯაღმაიძის განცხადებით, შესაძლოა, ახლად არჩეულმა პატრიარქმა, შიო მესამემ დაკავებული მოქალაქეების გათავისუფლების საკითხი დააყენოს.

როგორც ჯაღმაიძემ ჟურნალისტებს განუცხადა, ამ საკითხზე ხელისუფლებასთან იმსჯელებენ.

„მე მაშინ ვთქვი, რომ კვლავ დავაყენებთ საკითხს და ვისაუბრებთ ამაზე ხელისუფლებასთან, გიდასტურებთ, ასე იქნება. ახლა ძალიან რთულია გეგმებზე ლაპარაკი, როდის რა იქნება. ჩვენ ახლა ბევრი რამე გვაქვს მოსაწესრიგებელი. გეუბნებით, რომ ეს იქნება“, – აღნიშნა ჯაღმაიძემ.

საუბარია პროევროპული დემონსტრაციების დროს დაკავებულებზე, რომლებიც 2024 წლის ნოემბერ-დეკემბერში საპროტესტო აქციების დროს დააკავეს. აქციები მოჰყვა პრემიერ-მინისტრის ირაკლი კობახიძის განცხადებას, რომელმაც თქვა, რომ უარს ამბობენ 2028 წლის ბოლომდე ევროკავშირთან მოლაპარაკების გახსნაზე. ამ განცხადებას ქვეყანაში მასობრივი საპროტესტო აქციები მოჰყვა. საპროტესტო აქციების მონაწილეები ხელისუფლებას ევროინტეგრაციის პროცესის შეჩერებაში ადანაშაულებენ და ხელახალ საპარლამენტო არჩევნებს ითხოვდნენ.