არ ვაპირებთ კედლის აღმართვას საქართველოს გარშემო. გვინდა შრომითი საიმიგრაციო ნაკადების რეგულირება - გიორგი ცაგარეიშვილი
"მთავრობის მთავარი მიმართულება საქართველოს მოქალაქის დასაქმება გახლავთ. ჯერ ვზრუნავთ ჩვენ მოქალაქეებზე, მერე ვზრუნავთ დანარჩენ სამყაროზე", - ამის შესახებ ჯანდაცვის მინისტრის მოადგილემ გიორგი ცაგარეიშვილმა პარლამენტში განაცხადა, სადაც დასაქმების პოლიტიკის დაგეგმვისა და განხორციელების წლიურ ანგარიში წარადგინა.
მან უცხოელების დასაქმებასთან დაკავშირებით მიღებულ ცვლილებებზეც ისაუბრა.
"2023 წლიდან მოქმედებდა წესი, რითაც იურიდიული პირები ვალდებულები იყვნენ მათთან დასაქმებული უცხო ქვეყნის მოქალაქე,] ფიზიკური პირები დაერეგისტრირებინათ სისტემაში და პირველ მარტამდე, სანამ ახალი წესი ამოქმედდებოდა, ჩვენ ამ სისტემაში 62 000 უცხოელი გვყავდა. ვფიქრობ, ციფრი ბევრად მეტი იყო და სხვადასხვა მიზეზით, ადამიანები უბრალოდ არ რეგისტრირდებოდნენ.
ამ წლის ბოლომდე ყველა უცხოელს, რომელიც საქართველოში შემოდის სამუშაოდ, აქვს ვალდებულება დარეგისტრირდეს და მათ შორის 2027 წლის პირველ იანვრამდე აქვთ ვალდებულება ის 62,000 ვინც აღვნიშნე, ისინიც დარეგისტრირდნენ სისტემაში.
ეს ბევრ რამეს გადაგვიწყვეტს. პირველ რიგში აღრიცხვის და სტატისტიკის პრობლემას და სახელმწიფოს ეცოდინება, რა სექტორებში მუშაობენ ეს ადამიანები, სად გვაქვს დეფიციტი შრომის ძალასთან დაკავშირებით. თქვენ იცით, რომ რამდენიმე მიმართულებით ნულოვანი კვოტებიც შემოვიღეთ და მე ვფიქრობ, ეს აუცილებელიც იყო, ყოველ შემთხვევაში ამ ეტაპზე ასეა და დავაკვირდებით ამ ტენდენციებს, როგორ იმოქმედებს ეს სტანდარტი და წესი.
მთავრობის მთავარი მიმართულება გახლავთ საქართველოს მოქალაქის დასაქმება. ჯერ ვზრუნავთ ჩვენ მოქალაქეებზე, მერე ვზრუნავთ დანარჩენ სამყაროზე. ნებისმიერ ქვეყანაში, ყოველ შემთხვევაში იმ საზოგადოებაში, რომელიც თავის თავს პატივს სცემს, მე ვფიქრობ, სწორედ ასე მოქმედებენ. თუ ასე არ ვიმოქმედებთ, სხვები იმოქმედებენ მერე ჩვენ მაგივრად. სრული პასუხისმგებლობით მინდა განვაცხადო, არც საქართველოს მთავრობა, არც ჯანდაცვის სამინისტრო, არც მით უმეტეს დასაქმების ხელშეწყობის სააგენტო არ აპირებს რაიმე კედლის აღმართვას საქართველოს გარშემო, ამას ჩვენ არ გავაკეთებთ და ვერც გავაკეთებთ. ჩვენ გვინდა შრომითი საიმიგრაციო ნაკადების რეგულირება, ფრთხილი თანამონაწილეობა ამ ბაზრის დარეგულირებაში, ტენდენციების შესწავლა, ხელშეწყობა დასაქმებაში, პირველ რიგში საქართველოს მოქალაქეების და რა თქმა უნდა უცხო ქვეყნის მოქალაქეების. ჩვენ საქართველოს ბაზარზე გვჭირდება განათლებული, შეძლებული, კვალიფიციური უცხო ქვეყნის მოქალაქე", - განაცხადა მინისტრის მოადგილემ.