Armani-ს 15%-იანი წილი L'Oreal-ს, LVMH-სა და EssilorLuxottica-ს შორის გაიყოფა

იტალიური მოდის სახლი Giorgio Armani განიხილავს, რომ დიზაინერის გარდაცვალების შემდეგ 15%-იანი წილი სამ თანაბარ ნაწილად გაყოს. ეს ნაბიჯი პოტენციურად შემოიყვანს იმ სამ მყიდველს, რომლებიც თავად არმანიმ სასურველ აქციონერებად შეარჩია.

ჯორჯო არმანიმ, რომელიც 2025 წლის სექტემბერში 91 წლის ასაკში გარდაიცვალა, კომპანიის სასურველ მყიდველებად ფრანგული ფუფუნების ჯგუფი LVMH და ორი კომერციული პარტნიორი: კოსმეტიკის მწარმოებელი L'Oreal-ი და სათვალეების მწარმოებელი EssilorLuxottica დაასახელა.

დამფუძნებლის ანდერძის თანახმად, ჯგუფის საწყისი 15%-იანი წილის გაყიდვა მისი გარდაცვალებიდან 12-18 თვის განმავლობაში უნდა განხორციელდეს.

იტალიური გაზეთი la Repubblica წერს, რომ Armani-ს აღმასრულებელი დირექტორი ჯუზეპე მარსოჩი ბიზნეს-გეგმას ამზადებს და პარალელურად გაყიდვის პროცესის ზედამხედველობისთვის ორი მრჩევლის დანიშვნას გეგმავს.

ამის შემდეგ მრჩევლები მარსოჩის 5-წლიან ბიზნეს-გეგმას პოტენციურ ინვესტორებს გაუზიარებენ.

პროცესის ოფიციალურად დაწყებამდე, ჯგუფი 15%-იანი წილის სამ ნაწილად გაყოფას განიხილავდა. გაზეთის ცნობით, ეს ხელს შეუწყობდა სამივე მყიდველის ჩართულობის შენარჩუნებას საწყის ეტაპზე.

Armani-ს წარმომადგენელმა ამ ინფორმაციაზე კომენტარის გაკეთებაზე უარი განაცხადა.