აშშ-ის ძალებმა და ირანმა ჰორმუზის სრუტეში ერთმანეთს ცეცხლი გაუხსნეს

აშშ-ის ძალებმა და ირანმა ჰორმუზის სრუტეში ერთმანეთს ცეცხლი გაუხსნეს. აშშ-ის ცენტრალური სარდლობის (CENTCOM) განცხადებით, ამერიკულმა მხარემ ირანის თავდასხმას "თავდაცვის მიზნით" უპასუხა. როგორც ირკვევა, ირანულმა ძალებმა სტრატეგიულ წყალგამყოფში მყოფ სამ ამერიკულ გამანადურებელზე იერიში რაკეტებით, დრონებითა და მცირე ზომის კატარღებით მიიტანეს. სარდლობის განმარტებით, ამერიკულმა ძალებმა ყველა საფრთხე წარმატებით გაანეიტრალეს. აღსანიშნავია, რომ ინციდენტის შედეგად ამერიკული ხომალდები არ დაზიანებულა. ცნობისთვის, იერიშის სამიზნე ხომალდები Truxtun-ი, Rafael Peralta და Mason-ი იყვნენ.

დონალდ ტრამპმა სოციალურ ქსელში დაადასტურა, რომ ირანული დრონები "ჰაერშივე ფერფლად იქცა". რაც შეეხება საპასუხო დარტყმებს, მათ პრეზიდენტმა "ალერსიანი შეხება" უწოდა და აღნიშნა, რომ ამის მიუხედავადაც ცეცხლის შეწყვეტის რეჟიმი ძალაში რჩება. ამასთან, თეთრი სახლის ლიდერმა ირანი კიდევ უფრო "მკაცრი და ძალადობრივი" პასუხით გააფრთხილა. მისი თქმით, ვაშინგტონი აგრესიას იმ შემთხვევაში გააძლიერებს, თუ თეირანი ომის დასასრულებლად შეთანხმებას ხელს არ მოაწერს.

სრულიად განსხვავებულია განცხადებები ირანში. თეირანი აცხადებს, რომ აშშ-მა ცეცხლის შეწყვეტის პირობები დაარღვია. ადგილობრივი მედიის ინფორმაციით, ამერიკული დარტყმების სამიზნე სრუტეში მოძრავი ირანული ნავთობტანკერი გახდა.

კვირის განმავლობაში ეს მხარეებს შორის ცეცხლის გახსნის უკვე მეორე შემთხვევაა. სიცხადისთვის, ორშაბათს აშშ-ის ცენტრალურმა სარდლობამ, ადმირალ ბრედლი კუპერის ხელმძღვანელობით, ექვსი ირანული კატარღა გაანადგურა.