აშშ-ის მასშტაბით ყველა ავიარეისი შეჩერდა

აშშ-ის ფედერალურმა საავიაციო ადმინისტრაციამ პარასკევს, დღის მეორე ნახევარში, ქვეყნის მასშტაბით ყველა ავიარეისი შეაჩერა. მიზეზი რეგიონულ საჰაერო მოძრაობის მართვის ცენტრებში წარმოქმნილი საკომუნიკაციო პრობლემები გახდა.

FAA-ის განცხადებაში აღნიშნულია, რომ ფრენების შეჩერების გადაწყვეტილება „განსაკუთრებული გარემოებებისა და უსაფრთხოების მიზნებიდან გამომდინარე“ მიიღეს.

აშშ-ის ტრანსპორტის მდივნის, შონ დაფის განმარტებით, საკომუნიკაციო ხარვეზი შეეხო 22 რეგიონულ ცენტრს, რომლებიც ქვეყნის მასშტაბით აეროპორტებს შორის მოძრავ თვითმფრინავებს მართავენ. მისივე თქმით, ადგილზე ტექნიკოსები მუშაობენ და პრობლემის გამომწვევ მიზეზებს იკვლევენ.

ეროვნული უსაფრთხოების მდივნის, მარკუეინ მალინის განცხადებით, ამ ეტაპზე არ არსებობს არანაირი ნიშანი იმისა, რომ მომხდარი კიბერთავდასხმას ან რაიმე სახის ბოროტგანზრახულ ქმედებას უკავშირდება.

„ამ ეტაპზე არაფერი მიუთითებს იმაზე, რომ ეს ჩვენ წინააღმდეგ განხორციელებული მავნე თავდასხმა იყო. ეს უბრალოდ სატელეკომუნიკაციო ხარვეზია“, - განაცხადა მალინმა.

ეს ქვეყნის მასშტაბით ფრენების სრული შეჩერების პირველი შემთხვევაა 2023 წლის იანვრის შემდეგ, როდესაც FAA-ის ერთ-ერთი მთავარი კომპიუტერული სისტემა მწყობრიდან გამოვიდა. მანამდე მსგავსი მასშტაბის შეზღუდვა ბოლოს 2001 წლის 11 სექტემბრის ტერაქტების შემდეგ დაწესდა.