აშშ-მა საუდის არაბეთისთვის $24.3 მილიარდის F-35-ების მიყიდვა დაამტკიცა

აშშ-ის სახელმწიფო დეპარტამენტმა საუდის არაბეთისთვის $24.3 მილიარდის ღირებულების F-35 ტიპის გამანადგურებლების მიყიდვის გადაწყვეტილება მიიღო. არსებული ინფორმაციით, შეთანხმება Lockheed Martin-ის წარმოებულ 48 ერთეულ საბრძოლო თვითმფრინავს და Pratt & Whitney-ის 49 ძრავას მოიცავს. პაკეტში ასევე შედის: საავიაციო სათადარიგო ნაწილები, საკომუნიკაციო მოწყობილობები და შესაბამისი ლოგისტიკური მომსახურება.

საყურადღებო ფაქტია, რომ გარიგების ძალაში შესასვლელად ოფიციალურმა პირებმა აშშ-ის კონგრესისგან თანხმობა უნდა მიიღონ. ვაშინგტონში საუდის არაბეთის საელჩო პრეზიდენტის ადმინისტრაციის გადაწყვეტილებას უკვე გამოეხმაურა და მას მხარი ღიად დაუჭირა. დიპლომატიური უწყების შეფასებით, ეს სვლა ორ ქვეყანას შორის სტრატეგიული პარტნიორობის გაძლიერების ნამდვილი ნიშანია.

მნიშვნელოვანია ითქვას, რომ ეს გადაწყვეტილება ახლო აღმოსავლეთში სამხედრო ძალთა ბალანსს ცვლის და ვაშინგტონის მიერ მოკავშირე ისრაელისთვის მიცემულ გარანტიებს ეჭვის ქვეშ აყენებს. როგორც ცნობილია, აქამდე ამერიკული კანონმდებლობა კონფლიქტურ რეგიონში თელ-ავივის „ხარისხობრივი სამხედრო უპირატესობის“ შენარჩუნების ვალდებულებას აწესებდა. ეს პრინციპი არაბულ მეზობლებთან შედარებით ისრაელის არმიისთვის უფრო დახვეწილი შეიარაღების მიწოდებას გულისხმობდა. თავად ისრაელმა F-35-ის ტიპის სტელს-გამანადგურებლები ჯერ კიდევ 10 წლის წინ მიიღო და რეგიონში ამ ტექნოლოგიის ერთადერთ ოპერატორად მიიჩნეოდა. საუდის არაბეთი მეორე სახელმწიფო გახდება მსგავსი შესაძლებლობებით. როგორც ირკვევა, ოფიციალური ერ-რიადი შეიარაღების მიღებით მიზნად საკუთარი სამხედრო ძალების განახლებას და ირანის მხრიდან მომდინარე რეგიონული საფრთხეების შეკავებას ისახავს.

ცნობისთვის, საუდის არაბეთის საჰაერო ძალები ამჟამად Boeing-ის წარმოებულ F-15-ებს, ასევე ევროპულ Tornado-სა და Typhoon-ის გამანადგურებლებს იყენებს.