აშშ-ში ინფლაცია მკვეთრად გაიზარდა

ამერიკის შეერთებულ შტატებში სამომხმარებლო ფასები იმაზე სწრაფად იზრდება, ვიდრე ამას ანალიტიკოსები პროგნოზირებდნენ. შრომის სტატისტიკის ბიუროს უახლესი მონაცემების მიხედვით, აპრილში სამომხმარებლო ფასების ინდექსი წლიურ ჭრილში 3.8%-მდე გაიზარდა, რაც 2023 წლის მაისის შემდეგ ყველაზე მაღალი ნიშნულია.

აღსანიშნავია, რომ ყოველთვიურმა ზრდამ 0.6% შეადგინა. მიუხედავად იმისა, რომ თვიური დინამიკა პროგნოზებს დაემთხვა, წლიური მაჩვენებელი Dow Jones-ის მოლოდინს 0.1 პროცენტული პუნქტით აღემატება. არსებული ინფორმაციით, ინფლაციის წლიური ტემპი მარტთან შედარებით ნახევარი პროცენტული პუნქტით არის გაზრდილი.

მნიშვნელოვანია ითქვას, რომ ინფლაციური ზეწოლის ძირითადი წყარო ენერგომატარებლების გაძვირება გახდა. ენერგორესურსებზე ფასები 3.8%-ით გაიზარდა. განსაკუთრებით მკვეთრად ბენზინის ღირებულება გაიზარდა, რაც წლიურ ჭრილში 28.4%-იან მატებას აფიქსირებს. რაც შეეხება სურსათს, აპრილში პროდუქტები 0.5%-ით გაძვირდა, წლიურმა მაჩვენებელმა კი 3.2% შეადგინა.

საბაზისო ინფლაცია (Core CPI), რომელიც საკვებისა და ენერგიის ცვალებად ფასებს არ მოიცავს, თვიურად 0.4%-ით, ხოლო წლიურად 2.8%-ით გაიზარდა. ეს მონაცემები ადასტურებს, რომ ინფლაცია კვლავ მნიშვნელოვნად აღემატება აშშ-ის ფედერალური რეზერვის 2%-იან სამიზნე მაჩვენებელს.

რაც შეეხება ცენტრალური ბანკის პოლიტიკას, აშშ-ის ფედერალური რეზერვი რთული არჩევანის წინაშე დგას. მაისის დასაწყისში გამართულ სხდომაზე მონეტარული პოლიტიკის უცვლელად დატოვებას მხარი უმრავლესობამ დაუჭირა, თუმცა საბჭოში ოთხი განსხვავებული პოზიცია დაფიქსირდა, რაც 1992 წლის შემდეგ ყველაზე მაღალი მაჩვენებელია. მმართველთა საბჭოს წევრი, სტივენ მირანი განაკვეთის 0.25 პროცენტული პუნქტით შემცირებას ემხრობოდა, სამი რეგიონული პრეზიდენტი კი იმ ფორმულირებას ეწინააღმდეგებოდა, რომელიც ბაზრის მიერ განაკვეთის სამომავლო შემცირების სიგნალად აღიქმება.

მნიშვნელოვანია ითქვას, რომ FED-ის მომავალი თავმჯდომარე, კევინ უორში განაკვეთების შემცირების მომხრეა, თუმცა ირანში მიმდინარე საომარი მოქმედებების ფონზე ამ პოზიციის შენარჩუნება არსებითად გართულდება.