აშშ-ში ინტერნეტი ქვეყნის ნებისმიერ წერტილში ხელმისაწვდომი გახდება

საკომუნიკაციო ინდუსტრიის ამერიკული გიგანტები - AT&T, T-Mobile-ი და Verizon-ი ამერიკის შეერთებულ შტატებში კავშირის ე.წ. მკვდარი ზონების, ანუ იმ ადგილების გასაუქმებლად ერთიანდებიან, სადაც ინტერნეტი დღემდე არ არის ხელმისაწვდომი.

პროექტი ხმელეთზე არსებული სხვადასხვა რესურსების, მათ შორის ფიზიკური ინფრასტრუქტურის გაერთიანებას და სოფლის მეურნეობის რეგიონებში დაფარვის გაზრდას ითვალისწინებს. როგორც ირკვევა, ეს პარტნიორობა თანამგზავრული სიმძლავრეების გაუმჯობესების გზით საიმედო კავშირის უზრუნველყოფასაც მოიცავს.

ძალთა გაერთიანების ფარგლებში, უსადენო და თანამგზავრული პროდუქტებისთვის ერთიანი ტექნიკური სტანდარტის შემუშავდება. კომპანიები ინვესტიციებს იმ თანამგზავრულ ტექნოლოგიებში განახორციელებენ, რომლებიც მობილური მოწყობილობების პირდაპირ კავშირს უზრუნველყოფს. აღნიშნული ნაბიჯით პარტნიორები მომხმარებლებისთვის საიმედო და ყოველთვის ხელმისაწვდომი ქსელის შექმნას შეუწხობენ ხელს.

AT&T-ის აღმასრულებელი დირექტორის, ჯონ სტანკის განცხადებით, პარტნიორობა ნებისმიერ ლოკაციაზე კავშირის შენარჩუნების პროცესს გაამარტივებს. მისი თქმით, გაერთიანება მომხმარებლებს საშუალებას მისცემს, ჰქონდეს წვდომა ინტერნეტთან როგორც მაგისტრალებზე, ისე ეროვნულ პარკებში. ასევე, საგანგებო სიტუაციების დროსაც. საყურადღებოა, რომ ოპერატორი კომპანიების მიერ უკვე გაფორმებული თანამგზავრული ხელშეკრულებები ძალაში დარჩება.

ცნობისთვის, თანამგზავრული სერვისების უპირატესობა ტრადიციული მეთოდებისაგან განსხვავებით არის ის, რომ ის უზრუნველყოფს იმ ტერიტორიების დაფარვასაც, სადაც ტრადიციული ფიჭური ქსელების მუშაობა შეზღუდულია.