"ათასი რაკეტა მზადყოფნაშია და მიმართულია ირანის ისლამური რესპუბლიკისკენ“ - დონალდ ტრამპი

აშშ-ის პრეზიდენტი დონალდ ტრამპი შაბათს ირანს "ათასი რაკეტით" დაემუქრა მას შემდეგ, რაც უზენაესი ლიდერის, აიათოლა ალი ხამენეის დაკრძალვისას, მისი მკვლელობის შესახებ ღია მოწოდებები გაისმა.

"ათასი რაკეტა მზადყოფნაშია და მიმართულია ირანის ისლამური რესპუბლიკისკენ, ხოლო ათასობით სხვა დაუყოვნებლივ მიჰყვება მათ, თუ ირანის მთავრობა საკუთარ მუქარას შეასრულებს", - დაწერა ტრამპმა თავის ვებგვერდზე.

აშშ-ის პრეზიდენტმა განმარტა, რომ ეს საპასუხო ნაბიჯია მის წინააღმდეგ გაჟღერებულ "მკვლელობის ან მკვლელობის მცდელობის" მუქარებზე.

ხამენეის დაკრძალვაზე შეკრებილებს ეკავათ პლაკატები და ბანერები, რომლებიც ტრამპისა და ისრაელის პრემიერ-მინისტრ ბენიამინ ნეთანიაჰუს მკვლელობისკენ მოუწოდებდნენ.

ტრამპმა ეს განცხადება პლატფორმა Truth Social-ზე მას შემდეგ გააკეთა, რაც აშშ-ის მაღალჩინოსნებმა ირანისგან საჯარო განცხადების გაკეთება მოითხოვეს იმის შესახებ, რომ ჰორმუზის სრუტე ღიაა და ამ სასიცოცხლოდ მნიშვნელოვან დერეფანში გამავალ გემებზე თავდასხმები აღარ განმეორდება.

თეირანს მსგავსი განცხადება ჯერ არ გაუკეთებია. პირიქით, ის დაჟინებით მოითხოვს, რომ მარშრუტი მის კონტროლს დაექვემდებაროს და მიეცეს გემების დაბეგვრის უფლება, რაც ეწინააღმდეგება ათწლეულების განმავლობაში არსებულ პრეცედენტს, რომლის მიხედვითაც სრუტე საერთაშორისო საწყალოსნო გზად მიიჩნევა.

მანამდე, რამდენიმე დღის განმავლობაში, აშშ საჰაერო დარტყმებს ახორციელებდა ირანის ობიექტებზე, ხოლო ირანმა საპასუხო იერიშები ახლო აღმოსავლეთის სხვადასხვა სახელმწიფოებზე მიიტანა. ეს დარტყმები მიმდინარე კვირის დასაწყისში ირანის მიერ სრუტეში სამ გემზე თავდასხმას მოჰყვა.

ირანის ომის დაწყების პირველივე დღეს, 28 თებერვალს, საჰაერო დარტყმის შედეგად 86 წლის ხამენეი დაიღუპა. ირანმა ხამენეი მხოლოდ მიმდინარე კვირაში დაკრძალა მრავალდღიანი სამგლოვიარო ცერემონიის შემდეგ, რომლის დროსაც მისი ცხედარი ირანისა და ერაყის სხვადასხვა ქალაქებში გადაასვენეს.