აუდიტი: ცესკოს ავტოპარკში კონტროლის ხარვეზები გამოვლინდა - საწვავის ლიმიტების დასაბუთება ვერ წარადგინეს
სახელმწიფო აუდიტის სამსახურმა ცენტრალური საარჩევნო კომისიის 2023-2024 წლების საფინანსო-ეკონომიკური საქმიანობის აუდიტის ფარგლებში ავტოპარკისა და სატრანსპორტო ხარჯების მართვასთან დაკავშირებული არაერთი ხარვეზი გამოავლინა.
აუდიტის ანგარიშის მიხედვით, ცესკოში სამორიგეო ავტომობილების კონკრეტულ თანამშრომლებზე გამოყოფა დოკუმენტურად არ დასტურდებოდა. უწყების განმარტებით, ავტომობილების გამოყენება და გამოყოფა, გარდა მივლინებების შემთხვევებისა, ძირითადად სატელეფონო მოთხოვნების საფუძველზე ხდებოდა. აუდიტორების შეფასებით, ეს პრაქტიკა არ უზრუნველყოფს განხორციელებული ოპერაციების სრულ და ზუსტ აღრიცხვას და კონტროლის სისტემის სისუსტეზე მიუთითებს.
ანგარიშში აღნიშნულია, რომ 2023-2024 წლებში ცესკოს ბალანსზე სულ 25 ავტომობილი ირიცხებოდა. აქედან 16 ავტომობილი განპიროვნებულად ემსახურებოდა თავმჯდომარეს, თავმჯდომარის მოადგილეს, მდივანსა და კომისიის წევრებს, ხოლო 9 ავტომობილი სამორიგეო რეჟიმში გამოიყენებოდა.
აუდიტმა პრობლემები გამოავლინა საწვავის ხარჯვის ლიმიტების განსაზღვრის მიმართულებითაც. კერძოდ, ცესკომ ვერ წარმოადგინა დოკუმენტური დასაბუთება, თუ რა კრიტერიუმებით განისაზღვრა კონკრეტული ავტომობილებისთვის საწვავის ლიმიტები. სახელმწიფო აუდიტის სამსახურის შეფასებით, ლიმიტების დადგენის პროცესის დაუდასტურებლობა ფინანსური მართვისა და კონტროლის სისტემის ხარვეზს წარმოადგენს.
ცალკე მიგნება უკავშირდება დაქირავებული ტრანსპორტით გადაზიდვებს. აუდიტის ანგარიშის თანახმად, ტრანსპორტის დაქირავების ხელშეკრულებებით გაწეული ხარჯების ადეკვატურობის დასადასტურებლად ცესკომ ვერ წარმოადგინა გადაზიდული ფასეულობების რაოდენობის, სახეობისა და მარშრუტების სრულყოფილი დოკუმენტაცია. აუდიტორები მიიჩნევენ, რომ ესეც ფინანსური მართვისა და კონტროლის სისუსტეზე მიუთითებს.
დოკუმენტის მიხედვით, 2023-2024 წლებში ტრანსპორტთან დაკავშირებულმა ჯამურმა ხარჯმა 2.7 მილიონ ლარს გადააჭარბა. აქედან ყველაზე დიდი ნაწილი 2.04 მილიონი ლარი ტრანსპორტის დაქირავებისა და გადაზიდვების მომსახურებაზე დაიხარჯა, ხოლო საწვავ-საპოხ მასალებზე 583.2 ათასი ლარი მიიმართა.