ავიაციის მსგავსი რაკეტების შექმნის მცდელობაში SpaceX-მა Starship-ზე $15 მილიარდზე მეტი დახარჯა

სააგენტო Reuters-ის მიერ მოპოვებული IPO-ს სარეგისტრაციო დოკუმენტის თანახმად, SpaceX-მა თავისი ახალი თაობის რაკეტის, Starship-ის შექმნაზე 15 მილიარდ დოლარზე მეტი დახარჯა. ეს თანხა ბევრად აღემატება კომპანიის მთავარი რაკეტის, Falcon-ის ხარჯებს.

ილონ მასკის კოსმოსური კომპანია სრულად მრავალჯერადი გამოყენების გამშვები სისტემის სრულყოფას უკვე თითქმის 10 წელია ცდილობს.

SpaceX-ის მოგებიანი ბიზნესის მომავალი იმ ფონზე, როცა ის 1.75 ტრილიონი დოლარის შეფასებით საჯარო ბაზრებზე გასასვლელად ემზადება, დიდწილად სწორედ Starship-ზეა დამოკიდებული. ეს ორსაფეხურიანი გიგანტური სარაკეტო სისტემა მასკის ამბიციების ცენტრალური ნაწილია, რაც Starlink-ის თანამგზავრების უფრო დიდი პარტიების გაშვებას, ადამიანების მთვარესა და მარსზე გაყვანას და, საბოლოოდ, დედამიწაზე არსებული ენერგოტევადი მონაცემთა ცენტრების ალტერნატივად, ხელოვნური ინტელექტის ათასობით გამომთვლელი თანამგზავრის ორბიტაზე განთავსებას გულისხმობს.

15-მილიარდიანი მაჩვენებელი, რომლის შესახებაც აქამდე არ გავრცელებულა ინფორმაცია, ფარავს იმ 400 მილიონ დოლარს, რაც SpaceX-მა მსოფლიოში ყველაზე ხშირად გამოყენებადი რაკეტის, Falcon 9-ის შესაქმნელად დახარჯა. სწორედ Falcon 9-მ განაპირობა კომპანიის კომერციული დომინაცია, რაც მას Starlink-ის ქსელის სწრაფად გაფართოებისა და კონკურენტებზე დიდი უპირატესობის მოპოვების საშუალებას აძლევს.

"ჩვენ ვაგრძელებთ მნიშვნელოვან ინვესტირებას ჩვენი უპირატესობის კიდევ უფრო გასაზრდელად. ვცდილობთ მივაღწიოთ სრულ და სწრაფ მრავალჯერად გამოყენებას მასშტაბურად, მათ შორის, 15 მილიარდ დოლარზე მეტის ინვესტირებით ჩვენი ახალი თაობის რაკეტაში, Starship-ში", - ნათქვამია SpaceX-ის IPO-ს კონფიდენციალურ სარეგისტრაციო დოკუმენტში.

ფაილის თანახმად, კომპანია მიზნად ისახავს, 2026 წლის მეორე ნახევარში Starlink-ის უახლესი თაობის (V3) თანამგზავრების გაშვება დაიწყოს. ეს სავარაუდოდ Starship-ის მეშვეობით მოხდება, რომლის სატვირთო განყოფილება განახლებულ თანამგზავრებზეა მორგებული და ერთ ფრენაზე 60-მდე მათგანს იტევს.

ეს რიცხვი მკვეთრად აღემატება Falcon-ის მიერ გაშვებული უფრო მცირე ზომის 24 თანამგზავრს, რაც ხაზს უსვამს იმას, თუ რამდენად მჭიდროდაა დაკავშირებული Starship-ის წარმატება Starlink-ის ეკონომიკასთან.

კომპანიის განვითარების ხარჯების ძირითადი ნაწილი ახლა Starship-ზე მოდის.

დოკუმენტის თანახმად, 2025 წელს SpaceX-მა თავისი კოსმოსური სეგმენტის კვლევისა და განვითარებისთვის 3 მილიარდი დოლარი გამოყო, რაც სრულად Starship-ის პროგრამას მოხმარდა (წინა წელს ეს მაჩვენებელი 1.8 მილიარდი დოლარი იყო). ეს მკვეთრი ზრდა ხაზს უსვამს, თუ რამდენად ფუნდამენტურად განსხვავდება Starship-ი Falcon-ისგან ან ნებისმიერი სხვა რაკეტისგან, რომელიც აქამდე შექმნილა.