აზერბაიჯანმა 16 წლამდე მოზარდებისთვის სოციალურ ქსელებში რეგისტრაცია აკრძალა
აზერბაიჯანის ხელისუფლებამ 16 წლამდე ასაკის ბავშვებისა და მოზარდებისთვის სოციალურ ქსელებში რეგისტრაცია აკრძალა. სამშაბათს, 30 ივნისს, ქვეყნის პარლამენტმა, მესამე და საბოლოო მოსმენით, დაამტკიცა ცვლილებები "ინფორმაციის შესახებ" და "ბავშვთა მავნე ინფორმაციისგან დაცვის შესახებ" კანონებში, ასევე ადმინისტრაციულ სამართალდარღვევათა კოდექსში.
ახალი კანონი ოფიციალურად გამოქვეყნებიდან 12 თვის შემდეგ შევა ძალაში.
ამასთანავე, 16-დან 18 წლამდე ასაკის მოზარდებს სოციალურ ქსელებში პირადი ანგარიშების შექმნა, მათი გამოყენება და კონტენტის განთავსება მხოლოდ მეურვეების თანხმობითა და ზედამხედველობის ქვეშ შეეძლებათ. გავრცელებული ინფორმაციით, მომხმარებელთა ასაკი დადასტურდება საბანკო ბარათის, ასევე მობილური ტელეფონის ნომრისა და ელექტრონული ფოსტის მისამართის მეშვეობით.
მოთხოვნების შეუსრულებლობა ითვალისწინებს ჯარიმას
მონაცემების სიზუსტის შემოწმებაზე პასუხისმგებლობა ეკისრებათ პროვაიდერებს — ანუ, სოციალური მედიის პლატფორმების მფლობელებს.
პლატფორმების სია, რომლებზეც ახალი წესები გავრცელდება, ჯერ არ დამტკიცებულა. თუმცა, ცნობილია, რომ სიაში შესვლის შემდეგ უცხოურ პროვაიდერებს მოეთხოვებათ აზერბაიჯანში ფილიალის ან წარმომადგენლობითი ოფისის გახსნა, ასევე მთავრობის უწყებებთან კომუნიკაციისთვის საკონტაქტო ცენტრის შექმნა.
თუ პლატფორმა ვერ დააკმაყოფილებს ყველა მოთხოვნას სიაში შეყვანიდან ექვსი თვის განმავლობაში, მას დაეკისრება ჯარიმა, რომელიც ჯამში 400,000 აზერბაიჯანულ მანათს შეადგენს (დაახლოებით 235 000 აშშ დოლარი). შემდგომი დარღვევები გამოიწვევს პროვაიდერის ტრაფიკის ეტაპობრივ შეზღუდვას ქვეყნის მასშტაბით.
კანონპროექტის მომზადებისას სფეროში არსებული საერთაშორისო გამოცდილება შეისწავლეს
მსოფლიოში პირველმა ბავშვებსა და მოზარდებს სოციალურ ქსელებზე წვდომა ავსტრალიამ აუკრძალა. შეზღუდვები ძალაში 2025 წლის დეკემბერში შევიდა. დარღვევებზე პასუხისმგებლობა სოციალური ქსელების მფლობელებს დაეკისრათ.
ამის შემდეგ ცნობილი გახდა, რომ ანალოგიური ზომების მიღება იგეგმება საფრანგეთში, ნორვეგიასა და ესპანეთში.
2026 წლის ივნისში ბრიტანეთმა გამოაცხადა, რომ 16 წლამდე ასაკის ბავშვებსა და მოზარდებს სოციალურ ქსელებზე წვდომა შეეზღუდებათ.
BM.GE
წყარო: bm.ge