აზერბაიჯანთან საეტაპო შეთანხმებები გაფორმდა, უმნიშვნელოვანესი იყო ივანიშვილი-ალიევის შეხვედრა - კობახიძე
ირაკლი კობახიძის განცხადებით, აზერბაიჯანულ მხარესთან რამდენიმე მიმართულებით საეტაპო მნიშვნელობის შეთანხმებები გაფორმდა. მისი თქმით, ამ პროცესში განსაკუთრებული როლი ითამაშა „ქართული ოცნების“ საპატიო თავმჯდომარის, ბიძინა ივანიშვილისა და აზერბაიჯანის პრეზიდენტის, ილჰამ ალიევის შეხვედრამ.
მთავრობის ადმინისტრაციაში გამართულ ბრიფინგზე კობახიძემ აღნიშნა, რომ მიღწეული შეთანხმებები მხოლოდ რკინიგზის საკითხით არ შემოიფარგლება, თუმცა ბაქო-თბილისი-ყარსის პროექტზე მუშაობა წარმატებით დასრულდა და რკინიგზის ეს მონაკვეთი თვის ბოლომდე ამოქმედდება.
ირაკლი კობახიძის განმარტებით, ბაქო-თბილისი-ყარსის რკინიგზის საქართველოს მონაკვეთზე სრულად პასუხისმგებელი იქნება „საქართველოს რკინიგზა“, ხოლო ოპერირებისთვის ერთობლივი ქართულ-აზერბაიჯანული საწარმო შეიქმნება. გარდა ამისა, 26 მაისიდან ქვეყნებს შორის სარკინიგზო მიმოსვლაც აღდგება.
გუშინ, 18 მაისს აზერბაიჯანში ხელი მოეწერა "დამატებითი გაზის" ხელშეკრულების 20 წლით გაგრძელებას და ელექტროენერგიისა და ნავთობის ტრანზიტის შეთანხმებებსაც.
აზერბაიჯანის პრეზიდენტი ილჰამ ალიევი საქართველოს 6 აპრილს ეწვია. ალიევი, რომელიც მეუღლესთან და სახელმწიფო მინისტრებთან ერთად ჩამოვიდა, მთავრობის წარმომადგენლებს, ასევე მმართველი პარტიის დამფუძნებელსა და მის საპატიო თავმჯდომარეს, ბიძინა ივანიშვილს შეხვდა.