აზერბაიჯანული გაზი შემდეგი 20 წლით "სოციალური ფასით" საქართველოს მიეწოდება - კობახიძე

ირაკლი კობახიძე ამბობს, რომ კომერციული საიდუმლოს გამო, ვერ იტყვის რა პირობებით განახლდა "დამატებით გაზზე" აზერბაიჯანთან ხელშეკრულება, თუმცა შედეგს საეტაპოს უწოდებს.

როგორც მთავრობის ადმინისტრაციაში გამართულ ბრიფინგზე მან თქვა, საქართველო შემდეგი 20 წლით იაფად მიიღებს აზერბაიჯანიდან გაზს.

"ეს იყო საეტაპო მნიშვნელობის შეთანხმება და რამდენიმე მიმართულებით გაფორმდა ხელშეკრულება. პირველი უკავშირდება გაზს და მის იმპორტს/ტრანზიტს აზერბაიჯანიდან. აქ განსაკუთრებული მნიშვნელობა ენიჭებოდა "სოციალური გაზის" შეთანხმების გაგრძელებას. იცით, რომ 20 წლით იყო ეს შეთანხმება დადებული და მას ვადა მიმდინარე წელს ეწურებოდა. განსაკუთრებით მნიშვნელოვანი იყო ჩვენი ქვეყნისთვის და ხალხისთვის, რომ ეს ხელშეკრულება გაგრძელდა. ანუ "სოციალური გაზი" შემდეგი 20 წლით "სოციალური ფასით" საქართველოს მიეწოდება . ასევე ელექტროენერგიის იმპორტთან და ტარიფთან დაკავშირებით გვაქვს ძალიან კარგი შედეგები. სამწუხაროდ, კომერციული საიდუმლოებაა ეს ხელშეკრულება და მისი დეტალები. რომ არ იყოს კომერციული საიდუმლოება კიდევ უფრო გასაგები გახდებოდა საზოგადოებისთვის ის უდიდესი სარგებელი, რაც ამ შეთანხმებას მოაქვს", - ამბობს კობახიძე.

საქმე ის არის, რომ სამხრეთკავკასიური გაზსადენის პროექტის ხელშეკრულებების თანახმად, საქართველოს აქვს ოფცია აზერბაიჯანიდან თურქეთში ტრანსპორტირებული გაზის 5% მიიღოს - კონტრაქტი ძალაშია 2068 წლამდე. გარდა ამისა, პროექტის ფუნქციონირების დაწყებიდან ანუ 2006 წლიდან 20 წლის განმავლობაში საქართველო პროექტის ინვესტორებისგან ბუნებრივი გაზის დამატებით მოცულობას - წელიწადში ნახევარ მილიარდ კუბურ მეტრ გაზს სპეციალურ ფასში ყიდულობს. სწორედ ე.წ. „დამატებით გაზის“ კონტრაქტს ეწურებოდა ვადა 2026 წლის ბოლოს.