ბაზრებსა და ბაზრობებზე სავაჭრო ადგილების რაოდენობა შემცირდა - საქსტატი

2025 წელს საქართველოში მოქმედი ბაზრებისა და ბაზრობების ტერიტორიებზე 46.5 ათასი სავაჭრო ადგილი იყო, რაც წინა წლის მაჩვენებელთან შედარებით დაახლოებით 2%-ით ნაკლებია.

საქსტატის მონაცემებით, მიუხედავად სავაჭრო ადგილების შემცირებისა, ბაზრებსა და ბაზრობებზე დასაქმებულთა საშუალო წლიური რაოდენობა უცვლელი დარჩა და 2.7 ათასი ადამიანი შეადგინა. ამასთან, მოვაჭრეთა საშუალო დღიურმა რაოდენობამ 36.1 ათასი ადამიანი შეადგინა.

ბაზრებისა და ბაზრობების ორგანიზებით დაკავებულ ეკონომიკურ სუბიექტებში, მათ შორის ბაზრობების დირექციებში, დასაქმებულთა 32.6% ქალი იყო. დასაქმებულთა რაოდენობის მიხედვით ყველაზე დიდი წილი თბილისზე მოდიოდა - დედაქალაქში სექტორში დასაქმებულთა 48.1% იყო კონცენტრირებული. ხოლო ყველაზე ცოტა შიდა ქართლში.

2025 წელს ყოველდღიური ვაჭრობა 153 ბაზარში მიმდინარეობდა, საკვირაო ვაჭრობა - 23 ბაზარში, ხოლო კვირის გარდა, სხვა დღეებში ვაჭრობდა 3 ბაზარი. დანარჩენ ბაზრებსა და ბაზრობებზე ვაჭრობა კვირის სხვადასხვა დღეებში ერთიდან ოთხ დღემდე გრაფიკით იყო ორგანიზებული.