"ბოლო თვე-ნახევარში გაყიდვების ზრდა შენელდა" - რა გავლენა აქვს ახლო აღმოსავლეთის მოვლენებს რითეილზე
რითეილ სექტორის წარმომადგენლების ნაწილი აცხადებს, რომ ბოლო თვე-ნახევარში გაყიდვების ზრდის ტემპი შენელდა.
როგორც Zara-ს, Massimo Dutti-ს, Mango-ს და სხვა ბრენდების ოპერატორი კომპანია “სინომი რითეილის” ხელმძღვანელმა "საქმის კურსის" ეთერში განაცხადა, წლის პირველი კვარტალი მათი ქსელების შემთხვევაში 25%-იანი ზრდით დაიხურა, თუმცა ბოლო კვირების განმავლობაში ზრდის ტემპი 15%-მდე შენელდა.
რეზო მაღალაშვილის თქმით, რეალიზაციის ტემპის შენელება ძირითადად ტურისტულ ლოკაციებში ფიქსირდება. შესაბამისად, კომპანიაში ამბობენ, რომ ეს გარემოება ახლო აღმოსავლეთის ომის ფონზე ისრაელიდან და ირანიდან ტურისტული ნაკადების კლებას უკავშირდება.
ამასთან, “სინომი რითეილის” ხელმძღვანელი ამბობს, რომ ზოგადად, საქართველოში რითეილ სექტორის ზრდის ტემპი განვითარებული ქვეყნების ზრდის ტემპს მკვეთრად აღემატება.
"ზოგადად, განვითარებულ ქვეყნებში ზრდა რითეილში არის ხოლმე დაახლოებით 3-დან 5%-მდე. ჩვენს შემთხვევაში ზრდა ბოლო 5 წლის განმავლობაში იყო ყოველთვის ორნიშნა. პოსტკოვიდ პერიოდის შემდეგ დაახლოებით 20-25%-იანი ზრდა იყო ხოლმე წლიდან წლამდე, რაც აბსოლუტურად არანორმალურია ჩვეულებრივ რითეილ სამყაროში. შესაბამისად, ადრე თუ რაღაცას ვაბრალებდით, ხან ერთ მიზეზს, ხან მეორეს, ახლა ჩვეულებრივ მოვლენად იქცა ის, რომ ორნიშნა ზრდა არის რითეილში ყოველ წელს. თუმცა არის მომენტები, რომელიც გასათვალისწინებელია.
ვიდრე ახლო აღმოსავლეთში სიმშვიდე იყო, ჩვენი კომპანიის მაგალითზე, რომელსაც საკმაოდ დიდი ქსელი გვაქვს, 60 მაღაზია, ზრდა 25% იყო პირველი კვარტალის ბოლოს. ბოლო თვე-ნახევრის განმავლობაში კი ზრდა შენელდა და 15%-ია. 15% საოცნებო ზრდა არის ზოგადად, თუმცა 25%-თან შედარებით ზრდის შენელებას ვხედავთ. თუმცა, ბოლო კვირებს რომ შევხედოთ, ეს 15%-იანი ზრდა არ შემცირებულა, სტაბილურად დგას ერთსა და იმავე მაჩვენებელზე, ამიტომ ვერ გეტყვით დინამიკაში ეს კიდევ შემცირდება, დასტაბილურდება თუ კიდევ დაუბრუნდება პირველი კვარტალის შედეგებს.