ბულგარეთის თავდაცვის ბიუჯეტი მშპ-ს 5%-მდე გაიზრდება

ბულგარეთი, თავდაცვის ხარჯებს მთლიანი შიდა პროდუქტის 5%-მდე გაზრდის – ამის შესახებ ქვეყნის პრემიერ-მინისტრმა ბრიუსელში გამოსვლისას განაცხადა.

მთავრობის ახალმა მეთაურმა ეს გადაწყვეტილება NATO-ს გენერალურ მდივან მარკ რუტესთან შეხვედრისას გააჟღერა. საყურადღებოა, რომ პრემიერ რუმენ რადევს აშშ-ის პრეზიდენტ დონალდ ტრამპის მიერ მოთხოვნილი ახალი ნიშნულის მიღწევის ზუსტი ვადები არ დაუკონკრეტებია. აქვე უნდა ითქვას, რომ ბულგარეთს ალიანსის მიერ დადგენილი 2%-იანი ზღვარი უკვე გადალახული აქვს.

ბალკანური ქვეყნის ლიდერთან შეხვედრის შემდეგ NATO-ს გენერალურმა მდივანმა, მარკ რუტემ სოციალურ ქსელ X-ში დაწერა, რომ თავდაცვის ხარჯებისა და წარმოების გაზრდა 7-8 ივლისს დაგეგმილი ანკარის სამიტის მთავარი პრიორიტეტი იქნება.

რაც შეეხება თავად ბულგარეთის ლიდერს, რუმენ რადევი წარსულში ბულგარეთის პრეზიდენტის პოსტს იკავებდა და აქტიურად აკრიტიკებდა არამარტო ევროკავშირს, არამედ NATO-საც. საპარლამენტო არჩევნების წინ იგი თანამდებობიდან გადადგა და დამაჯერებელი გამარჯვება მოიპოვა. წინასაარჩევნო კამპანიის დროს იგი პრორუსული განცხადებებით გამოირჩეოდა, თუმცა არჩევნებში გამარჯვების შემდეგ ევროპული კურსის ერთგულება საჯაროდ დაადასტურა.